Հայիթիի բնակիչները կվարձատրվեն պլաստիկ աղբը հավաքելու համար
Plastic Bank հասարակական կազմակերպությունը («Պլաստիկի բանկ»), որը զբաղվում է շրջակա միջավայրից պլաստիկ աղբ հեռացնելով, մինչև այն հասնի գետեր և օվկիանոս, առաջարկում է Հայիթիի բնակիչներին վարձատրության դիմաց հավաքել պլաստիկ աբղը: Այս մասին ասվում է ընկերության մամուլի հաղորդագրությունում:
Աղբյուրի հաղորդմամբ՝ հավաքված պլաստիկը հետագայում կվերամշակվի: Այս նպատակով ընկերությունը համագործակցում է Henkel քիմիական ընկերության հետ և Հայիթիում կառուցում պլաստիկ աղբ հավաքելու կենտրոններ:
Նշվում է, որ հավաքված պլաստիկը կօգտագործվի ընկերության ապրանքների փաթեթավորումը պատրաստելու համար:
Ինչպես The Guardian-ին պատմել է Laundry&Home Care ընկերության հետազոտությունների միջազգային բաժնի ղեկավար Թոմաս Մյուլլեր Քիրշբաումը, Henkel-ի նման փաթեթավորումը վաճառքի կհանվի 2018 թվականի երկրորդ կեսին:
«Մենք ցանկանում ենք փոխել մեր մատակարարման շղթան և շարժվել ցիկլային տնտեսության ուղղությամբ: Օվկիանոսային պլաստիկը կլինի մեր օգտագործած վերամշակված նյութերի փոքր, բայց շատ տեսանելի մասը», - ասել է նա: