Անսպասելի զարգացում «Սասնա ծռեր» խմբի 18 անդամների գործով. դատարանի որոշմամբ գործից մաս անջատվեց
«Սասնա ծռեր» խմբի 18 անդամների գործն այսօր Ավան և Նոր Նորք վարչական շրջանների ընդհանուր իրավասության դատարանում անսպասելի զարգացում ստացավ:
Ամեն ինչ սկսվեց, երբ նիստը նախագահող Արտուշ Գաբրիելյանը դատական նիստի մեկնարկին հայտարարեց, որ դատարանը հեռանում է խորհրդակցական սենյակ՝ դատական ակտ կայացնելու, իսկ խորհրդակցական սենյակից վերադառնալով՝ կարդաց վճիռը:
Ըստ վճռի՝քրեական գործից մաս անջատվեց՝ Արամ Մանուկյանի, Հակոբ Թամրազյանի, Տիգրան Մանուկյանի, Սերգեյ Կյուրեղյանի, Թորոս Թորոսյանի, Գևորգ Իրիցյանի, Հովհաննես Հարությունյանի, Արայիկ Հակոբյանի, Մարտիրոս Հակոբյանի, Արամ Հակոբյանի և Վարդան Գերավետյանի մասերը:
Հիշեցնենք, որ «Սասնա ծռեր» կոչվող զինված խումբը անցած տարվա հուլիսի 17-ին գրավել և երկու շաբաթ վերահսկողության տակ էր պահել Ոստիկանության պարեկապահակային ծառայության (ՊՊԾ) գնդի տարածքը: Այդ ընթացքում զոհվել էր երեք ոստիկան: Հուլիսի 31-ին խմբի անդամները հանձնվեցին իրավապահներին:
Փաստաբանները լրագրողների հետ զրույցում դժգոհեցին որոշման կապակցությամբ՝ պնդելով, որ այն չի նպաստի արդարադատության իրականացմանը: