Հայաստանի և Ինդոնեզիայի միջև դիվանագիտական հարաբերությունների հաստատման 25-ամյակի կապակցությամբ շնորհավորական ուղերձներ են փոխանակվել
Հայաստանի արտաքին գործերի նախարար Էդվարդ Նալբանդյանն ու Ինդոնեզիայի արտաքին գործերի նախարար Ռետնո Մարսուդին շնորհավորական ուղերձներ են փոխանակել՝ Հայաստանի և Ինդոնեզիայի միջև դիվանագիտական հարաբերությունների հաստատման 25-ամյակի կապակցությամբ:
Արտգործնախարար Նալբանդյանն իր ուղերձում նշել է, որ անցած 25 տարիների ընթացքում համատեղ ջանքերով լավ հիմք է ձևավորվել միջպետական հարաբերությունների զարգացման և երկու ժողովուրդների միջև բարեկամական կապերի խորացման համար:
Մեծապես արժևորելով փոխադարձ վստահության, հարգանքի և համագործակցության ոգով կատարված աշխատանքը՝ նախարար Նալբանդյանը համոզմունք է հայտնել, որ վերջին տարիներին երկկողմ հարաբերություններում արձանագրված ակտիվացումը կշարունակի զարգանալ՝ նպաստելով հայ-ինդոնեզական երկկողմ օրակարգի ընդլայնմանը:
Էդվարդ Նալբանդյանը նաև գոհունակություն է հայտնել միջազգային հարթակներում, հատկապես ՄԱԿ-ում, ձևավորված փոխշահավետ համագործակցության կապակցությամբ՝ հույս հայտնելով, որ այդ համագործակցության խորացումը կնպաստի խաղաղության և անվտանգության ամրապնդմանը ինչպես տարածաշրջանային, այնպես էլ միջազգային մակարդակում:
Արտգործնախարար Ռետնո Մարսուդին, շնորհավորանքներ հղելով Հայաստանի և Ինդոնեզիայի միջև դիվանագիտական հարաբերությունների հաստատման 25-ամյակի կապակցությամբ, նշել է, որ անցած 25 տարիների ընթացքում բարեկամության, հավասարության, ինչպես նաև փոխադարձ հարգանքի վրա հիմնված երկկողմ հարաբերություններն առավել ամրապնդվել և խորացել են:
Ռետնո Մարսուդին ընդգծելով, որ երկու երկրների ներուժը դեռևս լիովին օգտագործված չէ՝ համոզմունք է հայտնել է, որ երկու երկրները կարող են առավել զարգացնել և ընդլայնել տարբեր ոլորտներում փոխադարձ հետաքրքրություն ներկայացնող երկկողմ հարաբերությունները՝ հասցնելով դրանք որակական նոր, ավելի բարձր մակարդակի:
Եզրափակելով իր ուղերձը՝ Ինդոնեզիայի արտգործնախարարը վստահություն է հայտնել, որ դիվանագիտական հարաբերությունների հաստատման 25-ամյա հոբելյանը նոր լիցք կհաղորդի երկու երկրների միջև բարեկամության և համագործակցության ամրապնդմանը: