Ես էլ եմ պատրաստ մի կտոր հաց պակաս ուտել, բայց անվտանգ լինենք, բայց արդյո՞ք անվտանգության հարցը լուծվել է այս ընթացքում. Հ. Իգիթյանը՝ ԵԱՏՄ մտնելու մասին
Մինչև ԵԱՏՄ մտնելը Ռուսաստանի հետ առևտրաշրջանառությունը 0.2 տոկոս էր, 4 տարի է անցել, նորից այդ թիվը 0.2 տոկոս է: Այս մասին «Կենտրոն» հեռուստաընկերության «Հայկական ուրբաթ» հաղորդման եթերում ասել է միջազգային փորձագետ Հովհաննես Իգիթյանը:
«4 տարի առաջ ասում էին՝ ԵԱՏՄ մտնելով՝ մենք լուծում ենք քաղաքական և անվտանգության հարցեր: Ես էլ եմ պատրաստ մի կտոր հաց պակաս ուտել, բայց անվտանգ լինենք, բայց արդյո՞ք անվտանգության հարցը լուծվել է այս ընթացքում, 4 տարի է անցել: Այդ քանի՞ տարի հետո պետք է այդ լույսին հասնենք, 4 տարի գնում ենք ձեր ճանապարհով: Այն, որ ասում էին՝ մարդիկ կգան, այդ 170 մլն-անոց շուկան կբացվի, կգան ներդրումներ կանեն, ո՞վ է այստեղ եկել այդ 4 տարվա ընթացքում, քանի աշխատատեղ է բացվել, քանի տոկոսով է աճել մեր ապրանքների արտահանումը Ռուսաստան»,-նշել է Հովհաննես Իգիթյանը::
ԱԺ նախկին պատգամավոր Աղասի Արշակյան էլ ԵԱՏՄ մտնելու որոշումը համարում է մեր արտաքին քաղաքական պատմության մեջ շրջադարձային որոշում: Նա ԵԱՏՄ մտնելու փաստի դրական հետևանք է համարում այն, որ, օրինակ՝ այս տարի 6 ամսվա ընթացքում Հայաստանից մեկնողների և վերադարձողների բալանսը մինուս 15 հազար է: Նա հիշել է, որ անցած տարի այդ թիվը 70 հազար էր, նախանցած տարի՝ 100 հազար. «Այսինքն՝ դա հիմնականում «խոպանչիների» թիվն էր, 100 հազար ավելանում էր առաջին կիսամյակում, տարեվերջին այդ թիվը նվազում էր և մենք տարեվերջին բացասական բալանս էինք ունենում՝ 30-35 հազար մարդ: Հիմա այս տարի ես հաստատ կարող եմ ասել, որ մենք մեկնողների և վերադարձողների միջև բացասական բալանս չենք ունենա»:
Նա դա վերագրում է վերջին շրջանի ոչ շոշափելի առանձին հաջողություններին: Աղասի Արշակյանը դա կապում է ԵԱՏՄ-ի և այսօրվա կառավարության կուրսի հետ:
«Հիմա ինձ չշտապեն մեղադրել, որ ես դարձա հանրապետական, ես հանրապետական չեմ, հանրապետականները որդեգրեցին այն կուրսը, որին ես դավանել եմ 20 տարի առաջ»,-ասել է նախկին պատգամավորը:
Մեկ այլ օրինակ է նա բերել, ըստ որի՝ ԵԱՏՄ մտնելուց հետո բանկավարկային համակարգում հսկայական փոփոխություն կա: «Բնակավայրեր կան, որ ամբողջ համայնքը այս կամ այն բանկից 24-26 տոկոսով վարկերի տակ է: Հիմա այդ տոկոսադրույքները դարձել են 5 տոկոս, կոլեկտիվ տնտեսությունների դեպքում՝ 3 տոկոս: Դա նաև ԵԱՏՄ-ի հետ է կապված»:
Նախկին պատգամավորը կարևորում է քաղաքական գիծը, որի համար Աղասի Արշակյանի խոսքով՝ ինքն իր կյանքի լավագույն մի քանի տարին այդ ուղղությանն է նվիրել:
«Ես ամեն դեպքում այդ ճանապարհի վերջում լույս տեսնում եմ: Մենք գնում էինք, բայց չգիտենք, թե ուր: Հիմա գիտենք՝ ուր ենք գնում: Աշխարհում բոլոր տեսակի կռիվները, պետություններ ստեղծելն ու քանդելը շուկայի համար են: Հիմա մենք վերագտնում ենք մեր կորցրած շուկան: ԵԱՏՄ-ից ոչ միայն պետք չէ դուրս գալ, այլ պետք է այնտեղ ամրանալ և, մեր շահերը լավ գիտակցելով, առաջ շարժվել»,-եզրափակել է Աղասի Արշակյանը: