Երևանը պետք է մեծ ուշադրությամբ հետևի Իրաքյան Քուրդիստանի իրադարձություններին՝ տարբեր շրջափուլերում մանևրելու համար. արաբագետ
Արաբագետ Արմեն Պետրոսյանի խոսքով՝ չնայած Թուրքիայի նախագահ Ռեջեփ Թայիփ Էրդողանի հայտարարություններին, թե Իրանի հետ համատեղ գործողություններ են իրականացնելու Սիրիայի հյուսիսում գործող ահաբեկչական կազմակերպությունների դեմ, Իրանը նման քայլի չի գնա: Նա Tert.am-ի հետ զրույցում նկատեց, որ իրանական կողմն արդեն հերքել է, որ նման համատեղ գործողությունների իրենք նախապատրաստվում են: Ւրանը, արաբագետի խոսքով, առավել զգույշ է իր գործողություններում:
«Սիրիայի քրդական ուժերի դեմ պայքարելու իրանական և թուրքական ծրագրերը տարբեր են: Թուրքական կողմը նրանց դիտարկում է որպես Քրդական աշխատավորական կուսակցության ճյուղավորում, իսկ իրանական կողմը նույն դիտարկումը չունի այդ ուժերի վերաբերյալ»,- նշեց նա՝ հավելելով, որ ամեն դեպքում, քրդական խնդիրն այսօր իսկապես միավորող գործոն է համարվում Թուրքիայի, Իրանի, Սիրիայի և Իրաքի գործող իշխանությունների համար:
Նա նշեց, որ քրդական խնդիրն առավել շատ անհանգստացնում է Թուրքիային, չբացառեց, որ վերջինս կփորձի Սիրիայի հյուսիսում որևէ գործողություն իրականացնել: Մինչ այս պահը Թուրքիայի կողմից անընդհատ ձգձգվող այդ գործողությունները, արաբագետի ենթադրությամբ, պայմանավորված են եղել թուրք-ամերիկյան պայմանավորվածություններով, բանակցություններով:
«Երևի թե Միացյալ Նահանգները տվել է Թուրքիային որոշակի երաշխիքներ, որ քրդերը Ռաքքայի ազատագրումից հետո կդադարեցնեն իրենց առաջխաղացումը: Այսինքն՝ կարծում եմ, որ ամերիկյան կողմից քաղաքական խնդիրները խաղաղ ճանապարհով լուծելու երաշխիքներ են տրվել: Որոշակի ժամանակ էլ սպասենք, Ռաքքայի ամբողջական ազատագրումից հետո, կարծում եմ, ամեն բան արդեն իր տեղը կընկնի»,- նշեց նա:
Քրդական ուժերի ազդեցության մեծացումը, ըստ նրա, անհանգստացնում է շատ ուժերի: Խոսելով սեպտեմբերի 25-ին Իրաքյան Քուրդիստանի անկախության հանրաքվեի մասին՝ արաբագետը նկատեց․ «Քրդական գործոնի ակտիվացումը և քրդական պետության ստեղծումը այսօր և՛ տարածաշրջանում, և՛ տարածաշրջանից դուրս, մեղմ ասած, չեն ողջունվում: Հիմնական արտաքին և տարածաշրջանային դերակատարները, այդ թվում՝ ԱՄՆ-ը, դեմ են, որ նման անկախ միավորում ստեղծվի»,- նշեց նա։
Արմեն Պետրոսյանի խոսքով՝ իր դիտարկման պատճառն այն է, որ այսօր տարածաշրջանում իրավիճակը շառ խառն է, և ոչ ոք չի ցանկանում մի խնդրի ծայրահեղականությունից դեռևս չազատված՝ ընկնել մեկ այլ խնդրի մեջ:
«Եթե հիմա քրդերը գնան ինքնորոշման ճանապարհով, դա լինելու է ուժի, սրի և կրակի միջով: Նրանց որևէ մեկը խաղաղ ճանապարհով թույլ չի տա ինքնորոշվել»,- նշեց նա՝ նկատելով նաև, որ քրդերը ևս հասկացել են, որ իրավիճակը չի կարելի սրել՝ հաշվի առնելով այլ ազդեցիկ երկրների վերաբերմունքը հանրաքվեի նկատմամբ:
Արաբագետը չբացառեց, որ Իրաքյան Քուրդիստանը, ինչպես նախկինում, հիմա էլ փորձի իր ինքնորոշման հարցը Իրաքի կենտրոնական իշխանությունների հետ բանակցությունների միջոցով լուծել:
«Կարծես թե դրա «մեսիջներն էլ» կան»,- նշեց նա՝ հավելելով, որ իրաքյան քրդերի համար էլ դժվար կլինի լիովին անկախանալը. դա, ըստ Արմեն Պետրոսյանի, կլինի լիովին մեկուսացում, որին նրանք պատրաստ չեն:
Արմեն Պետրոսյանի խոսքով՝ Մերձավոր Արևելքում, Քուրդիստանի շուրջ ծավալվող իրադարձությունները պետք է հետաքրքրեն մեզ, թեև ուղղակիորեն իրենց ազդեցությունը չունեն Հայաստանի վրա:
«Երևանը պետք է մեծ ուշադրությամբ հետևի այդ իրադարձություններին՝ տարբեր շրջափուլերում մանևրելու համար՝ հաշվի առնելով, որ այդ գործընթացներում ներգրավված են մեզ հարևան, բարեկամ և ոչ բարեկամ երկրներ: Բայցի այդ, մենք ունենք շահեր այդ տարածքում, այնտեղ ունենք համայնք: Իրաքյան Քուրդիստանի հետ ունենք նաև առևտրատնտեսական հարաբերություններ, Էրբիլ քաղաքում հյուպատոսարան ունենք, ինչը նշանակում է, որ մենք հետաքրքրված ենք այդ տարածքով: Առհասարակ, իրաքյան քրդերի խնդիրը դառնալու է տարածաշրջանի կարևորագույն խնդիրներից մեկը, և փորձ է արվելու խաղարկվել նաև տարբեր դերակատարների կողմից»: