ՏԻՄ ընտրություններին ընդառաջ Ախալքալաքում լարվածություն կա, մեր քաղաքական հակառակորդն ադրբեջանամետ է. նախկին պատգամավոր
Այս տարվա հոկտեմբերի 21-ին Վրաստանի բնակիչներն ընտրելու են տեղական ինքնակառավարման մարմիններ՝1058 պատգամավոր , ինչպես նաև 64 քաղաքապետ և շրջանային ղեկավար: Այս առնչության տեղի մամուլի փոխանցմամբ՝ սեպտեմբերի 2-ին Վրաստանի խորհրդարանի նախկին անդամ Սամվել Պետրոսյանը և նրա որդին՝ Գիորգի Պետրոսյանը, սպառնացել են Ախալքալաքի շրջանային ընտրական հանձնաժողովի նախագահ Հասմիկ Մարանգոզյանին: Մթնոլորտի լարվածության, թեկնածու առաջադրվելու և այլ հարցերի շուրջ Tert.am-ը զրուցեց Սամվել Պետրոսյանի հետ:
-Հոկտեմբերի 21-ին ընդառաջ ի՞նչ մթնոլորտ է Ախալքալաքում: Միջադեպեր են գրանցվել արդեն:
-Քաղաքական լարվածություն կա, մի փոքր լարված է մթնոլորտը, պայմանավորված ԿԸՀ-ի հետ: Մենք մեր ունեցած փաստերը ներկայացրել ենք Կենտրոնական ընտրական հանձնաժողով և սպասում ենք արձագանքի: Ակնկալում ենք, որ ԿԸՀ –ն կգործի օրենքի շրջանակներում և նախընտրական շրջանում օրենքներ չեն խախտվի:
-Թեկնածուներ կա՞ն հաստատված և դուք առաջադրելո՞ւ եք Ձեր թեկնածությունը:
-Դեռ չեն հաստատվել թեկնածուները, բայց անուններ շրջանառվում են: Ես առաջադրվելու եմ, որովհետև իմ կողքին կանգնած քաղաքացիներն են դա պահանջում: Առաջադրվելու եմ «Պատրիոտների ալյանս» կուսակցության կողմից:
- Վրաստանի կենտրոնական ընտրական հանձնաժողովի հայտարարության համաձայն՝ սեպտեմբերի 2-ին դուք սպառնացել եք Հասմիկ Մարանգոզյանին: ԿԸՀ-ի տեղեկացմամբ՝ քանի որ նշված փաստերը հնարավոր է հանցագործության նշաններ պարունակեն՝ գործն ուղարկվել է դատախազություն: Ի՞նչ է տեղի ունեցել:
-ԿԸՀ-ն նյութեր է նախապատրաստել, դիմել է դատախազություն, համարելով, որ հնարավոր է հանցագործության նշաններ պարունակի միջադեպը: Բայց, ես ինքն եմ պահանջելու, որ իրենք հաստատեն, թե ես իբր նման ցանկություն եմ հայտնել, թե իբր սպառնացել եմ այրել տունը և այլն: Ես չեմ հասկանում, թե ինչում են ինձ մեղադրում: Իրենք գիտեն, որ մեր կողմնակիցները շատ ուժեղ են և փորձում են խոչընդոտներ ստեղծել:
-Ովքե՞ր են ձեր հակառակորդները, որ փորձում են խոչընդոտներ ստեղծել:
-Մեր հեղինակությունը բարձր է այստեղ, որովհետև ժողովրդավար սկզբունքներով ենք առաջնորդվում: Հայտնի է, որ Ջավախքն այսօր հայաբնակ շրջան է, մեր ուժն էլ պաշտպանում է ազգային փոքրամասնությունների իրավունքը:Մեր քաղաքական հակառակորդն առավել ադրբեջանամետ է, մենք կարող ենք դա հաստատել, դրա համար էլ ցանկանում են մեզ ճնշել, որ չհասնենք մեր քաղաքական նպատակներին:
-Կհստակեցնենք, մասնավորապես ովքեր են ադրբեջանամետները, ի՞նչ հիմք ունեք նման կարծիք ունենալու համար:
-Կա այստեղ խումբ, որը կապեր ունի ադրբեջանցիների հետ, Socar ընկերության հետ և այդ մարդիկ այսօր մտել են իշխանական կուսակցության մեջ և օգտագործելով իշխանական լծակները բարդացում են իրավիճակը, բնականաբար նրանց հետաքրքիր չէ ժողովրդի շահերը: Ավելին, ես ասեմ, որ այդ ուժերի շնորհիվ Վրաստանի խորհրդարանում այսօր ավելի շատ ադրբեջանցի, քան հայ պատգամավոր կա, որի դեմ մենք այսօր պայքար ենք տանում: Ավելին, ասեմ, որ ադրբեջանական խմբերի կողմից էքսպանսիան շատ մեծ է, մենք դեմ ենք դրան, դրա համար էլ շատ հավանական է: Մենք պայքարում ենք դրա դեմ: