Կամավորը պետք է աշխատի օրենսգրքով նախատեսված աշխատաժամերի սահմաններում, նույնիսկ եթե ցանկանում է ավելի երկար աշխատել. պաշտոնյա
«Կամավորական գործունեության և կամավոր աշխատանքի մասին» ՀՀ օրենքի նախագծով նախատեսված են մի շարք կարգավորումներ, որոնք վերաբերում են կամավորական աշխատանքներ տանող անձանց վարձատրությանը, նրանց արձակուրդներին ու հաշվառման մատյաններում գրանցելուն:
Այս մասին Tert.am-ին տեղեկացրեց Աշխատանքի և սոցիալական հարցերի նախարարության Աշխատանքի և զբաղվածության վարչության պետ Ժորա Սարգսյանը:
«Նախ, ընդհանրապես կարգավորված չէր դաշտն այն առումով, որ տարանջատում չկար՝ որ աշխատանքն է համարվում օրինական, որը` կամավոր, հստակ գիծ չկար: Հաշվառման մատյաններում գրանցում չկար, ու թեպետ իրենք անվարձահատույց աշխատանք են տանում, բայց դա շատ-շատերի համար կարևոր է, որպեսզի հետագայում հաշվվի աշխատանքային փորձ, ստաժ կամ դիտվի որպես խրախուսական ինչ-որ բան»,-ասաց նախարարության աշխատակիցը:
Նրա տեղեկացմամբ՝ Հայաստանում նման աշխատանքներ կամավորների կողմից տարվում են մշակույթի, սպորտի, առողջապահության, բարեգործական ծրագրերում ու ոլորտներում:
Նշենք, որ ՀՀ աշխատանքի և սոցիալական հարցերի նախարարության կողմից մշակվել է «Կամավորական գործունեության և կամավոր աշխատանքի մասին» ՀՀ օրենքի նախագիծը, ինչպես նաև այդ նախագծի կարգավորումներից բխող օրենսդրական փաթեթը` «Վարչական իրավախախտումների վերաբերյալ», «Բարեգործության մասին», «Հասարակական կազմակերպությունների մասին» և մի շարք այլ օրենքներում լրացումներ և փոփոխություններ կատարելու մասին օրենքի նախագիծը:
Աշխատանքի և զբաղվածության վարչության պետը Tert.am-ի հետ զրույցում հավելեց, որ օրենքով պետք է ամրագրվի, որ կամավոր գործունեության հիմքում պետք է լինի կամավորական աշխատանքի մասին պայմանագիրը, կամավորների աշխատանքային ժամերը պետք է տեղավորվեն աշխատանքային օրենսգրքի պահանջներում, նույնիսկ եթե կամավորը ցանկանում է օրական աշխատել, ասենք, 15 կամ 20 ժամ:
Կարգավորվելու են նաև այն դեպքերը, թե կամավորի կյանքին կամ առողջությանը վնաս պատճառվելու դեպքում որ կազմակերպությունը պետք է փոխհատուցի, ինչպես նաև կամավորի գործուղման, օրապահիկի, իր անձնական միջոցներից տարբեր ծախսերին վերաբերող իրավահարաբերություններ:
Նշենք, որ մինչև հոկտեմբերի 1-ը նախատեսվում է անցկացնել «Կամավորական գործունեության և կամավոր աշխատանքի մասին» ՀՀ օրենքի նախագծի հանրային և մասնագիտական քննարկումներ: