ԱՄՆ պետքարտուղարի պարտականությունները Թիլերսոնի փոխարեն կատարում է Նիկի Հեյլին. Foreign Policy
ԱՄՆ պետքարտուղար Ռեքս Թիլերսոնի պարտականությունները ներկա պահին ոչ պաշտոնապես կատարում է ՄԱԿ-ում ԱՄՆ մշտական ներկայացուցիչ Նիկի Հեյլին:
Այս մասին գրում է Foreign Policy պարբերականը՝ ընդգծելով, որ Թիլերսոնն աննկատ է դարձել վերջին ժամանակներում և նույնիսկ հայտարարությամբ հանդես չի եկել Հյուսիսային Կորեայի վերջին միջուկային փորձարկման հարցի շուրջ:
Մինչդեռ Հեյլին ոչ միայն հայտարարություն է արել ԿԺԴՀ-ի վերաբերյալ, այլև քննադատել է Իրանի հետ կնքված միջուկային գործարքը, որն ԱՄՆ նախագահ Դոնալդ Թրամփն անհաջող է համարում:
Պետքարտուղարությունում նշել են, որ պետքարտուղարը մեկնել է Տեխաս «Հարվի» փոթորիկի պատճառով, բայց շարունակում է կատարել իր աշխատանքային պարտականությունները:
Հիշեցնենք, որ ավելի վաղ The Washington Post պարբերականը հաղորդել էր, որ Թրամփը գնալով ավելի ու ավելի է հիասթափվում Թիլերսոնի կատարած աշխատանքից: