Ընդդիմադիրները թերի են համարում «Ժառանգության»՝ Սերժ Սարգսյանի վարչապետ դառնալու դեմ օրակարգը. պետք է դրվի համակարգի դեմ պայքարի հարցը
«Ժառանգություն» կուսակցությունը հունիսին կայացած իր համագումարի ժամանակ հստակ ձևակերպել էր, իսկ օրերս էլ վերահաստատել, որ իրենց առաջիկա օրակարգը լինելու է Սերժ Սարգսյանին թույլ չտալ դառնալ վարչապետ: Արտախորհրդարանական և խորհրդարանական ընդդիմադիր ուժերը Tert.am-ի հետ զրույցում ասացին, որ դեռևս չեն քննարկել «Ժառանգության» այս նախաձեռնությանը միանալու հարցը:
ԱԺ «Ելք» խմբակցության պատգամավոր Էդմոն Մարուքյանը, մասնավորապես, նշեց, որ որևէ քաղաքական ուժի օրակարգ չի կարող դառնալ իրենցը. «Մենք մեր օրակարգն ունենք և դրանով ենք զբաղվելու»,- ասաց նա: Իսկ առանձին, դաշինքի կողմից այս հարցի քննարկման հավանականության վերաբերյալ պատգամավորը հայտնեց, որ ցանկացած հարց իրենց համար քննարկման առարկա է:
«Հայ ազգային կոնգրես» կուսակցության անդամ, նախկին պատգամավոր և ազատամարտիկ Մյասնիկ Մալխասյանի տեղեկացմամբ՝ իրենց օրակարգում նման հարց չկա:
«Մենք մեր օրակարգն առաջ ենք քաշել, ժողովուրդն էլ իր ընտրությունը կատարել է: Մեզ համար անձերը չեն կարևոր, այլ որ երկիրը կարողանանք էս վիճակից դուրս բերել: Թե չէ՝ էս միակուսակցական համակարգում ով կգա, ում կդնեն,կնշանակեն՝ չկա մեր օրակարգում»,- ասաց Մյասնիկ Մալխասյանը:
«Ժառանգության» հետ այս թեմայով որևէ քննարկում չեն ունեցել նաև «Համախմբում» կուսակցության ներկայացուցիչները, ովքեր խորհրդարանական ընտրությունների ժամանակ նույն դաշինքի մեջ էին Րաֆֆի Հովհաննիսյանի գլխավորած կուսակցության հետ: Այս մասին Tert.am-ին հայտնեց կուսակցության մամուլի խոսնակ Արեգնազ Մանուկյանը:
«Ժողովրդավարական հայրենիք» կուսակցության նախագահ Պետրոս Մակեյանի անձնական տեսակետով՝ «Ժառանգությանը» այս օրակարգը լուրջ չէ: Ըստ նրա՝ գործընթաց սկսելու համար պետք է ձևակերպել հստակ քաղաքական օրակարգ:
«Սերժ Սարգսյանի վարչապետ չլինելու համար կարող է ժողովրդին հանես փողոց, և նա հայտարարի, որ ես վարչապետ չեմ լինելու, հետո ի՞նչ ես անելու: Քայլերը չպետք է նպատակաուղղված լինեն միայն Սերժ Սարգսյանի վարչապետ լինելու կանխմանը, դա երկրորդական է: Կարծում եմ՝ պետք է ազատվել գործող համակարգից, որ վերածվել է բանդայի՝ Հանրապետականի անվան տակ: Այ սրանից պետք է ազատվել»,- ընդգծեց Պետրոս Մակեյանը:
Գերագույն խորհրդի պատգամավոր Ազատ Արշակյանը, ով խորհրդարանական ընտրությունների ժամանակ սատարում էր պաշտպանության նախկին նախարար Սեյրան Օհանյանին, նույն կարծիքին է՝ հարկավոր է մերժել գործող համակարգը, վասալի կարգավիճակում գտնվող Հայաստանը, ոչ թե Սերժ Սարգսյանին:
«Հանրապետական կուսակցությունը՝ իր դաշնակից ՀՅԴ-ի հետ, ում որ նշանակի, նա էլ կլինի ՀՀ վարչապետը: Երբ որ ասում ենք՝ չենք պաշտպանում Սերժ Սարգսյանի վարչապետությունը, նշանակում է, որ դեմ ենք ՀՀԿ-ի և նրա դաշնակիցների իշխանությանը: Այսինքն՝ շուռ տված է ներկայացվում: Պետք է ասվի, որ մենք չենք պաշտպանում այս իշխանությանը, նրա թեկնածուներին, ոչ թե միայն Սերժ Սարգսյանին: Դա թյուրիմացության մեջ է գցում»,- ասաց նա: