Ամենայն Հայոց Կաթողիկոսն ընդունեց Փասադինայի քաղաքապետին
Սեպտեմբերի 2-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Ս. Էջմիածնում ընդունեց Փասադինայի (ԱՄՆ) քաղաքապետ պրն. Թերրի Թորնեքի գլխավորած պատվիրակությանը: Այս մասին տեղեկացնում են Մայր Աթոռ Սուրբ Էջմիածնի մամլո դիվանից։
Հանդիպմանը Ամենայն Հայոց Հայրապետը բարի գալուստ մաղթեց քաղաքապետին Սուրբ Էջմիածին։ Նորին Սրբությունը ողջունեց Վանաձորի ու Փասադինայի միջև 25 տարիներ առաջ ձևավորված սերտ կապերը և այսուհետ ևս արդյունավետ գործակցություն ցանկացավ քույր քաղաքներին։
Փասադինայի քաղաքապետը ևս ուրախություն հայտնեց հանդիպման առիթով, ապա խոսեց քաղաքի կյանքում հայ համայնքի կարևոր ներկայության և ներդրման մասին։ Կարևորելով Եկեղեցու առաքելությունը համայնքային կյանքում՝ տիար Թորնեքը տեղեկացրեց Վեհափառ Հայրապետին նաև քաղաքապետարանի և ԱՄՆ Հայոց Արևմտյան թեմի միջև ձևավորված կապերի վերաբերյալ։
Զրույցի ընթացքում անդրադարձ կատարվեց պատմական ժառանգության պահպանության ուղղությամբ ձեռնարկվող քայլերին, ինչպես նաև Մայր Աթոռ Սուրբ Էջմիածնի՝ կրթական և սոցիալական ոլորտներում ծավալած գործունեությանը։ Խոսվեց նաև տարածաշրջանում տիրող իրավիճակի և Հայ Եկեղեցու խաղաղարար առաքելության մասին։
Հանդիպման ավարտին քաղաքապետ պրն. Թերրի Թորնեքը Արտաքին հարաբերությունների և արարողակարգի բաժնի տնօրեն Գերաշնորհ Տ․ Նաթան արքեպիսկոպոս Հովհաննիսյանի ուղեկցությամբ այցելեց Մայր Տաճար, ծանոթացավ Ավանդատուն-թանգարանում պահվող հոգևոր և մշակութային արժեքներին։