Պաշտոնական Երևանը Իրանի հետ համագործակցության տրամաբանությանն ու ավանդույթներին հակառակ քայլ երբևէ չի անի. Հրանտ Մելիք-Շահնազարյան
Ավելի քան վստահ եմ, որ պաշտոնական Երևանը Իրանի հետ համագործակցության տրամաբանության կամ ձևավորված ավանդույթներին հակառակ քայլ երբևէ չի անի. Tert.am-ի հետ զրույցում նման տեսակետ հայտնեց քաղաքագետ Հրանտ Մելիք-Շահնազարյանը, պատասխանելով հարցին, թե Հայաստանը կարո՞ղ է հավասարակշռված քաղաքականություն վարել Իսրայելի հետ այնպես, որ չփչացնի հարաբերությունները, նախ և առաջ, Իրանի հետ:
Հիշեցնենք, որ Իսրայելի տարածաշրջանային հարցերով նախարար Ցախի Հանեգբին եռօրյա այցով Հայաստանում էր: Երևանում արտգործնախարար Նալբանդյանի հետ հանդիպմանը Իսրայելի նախարարը հայտարարել էր, թե Իսրայելը ցանկանում է զարգացնել բարեկամական հարաբերությունը Հայաստանի հետ: Հայաստանում նա հանդիպել էր արտգործնախարարի, վարչապետի հետ, գործակցության փաստաթղթեր ստորագրել տարբեր ոլորտների վերաբերյալ:
«Իրանի իսլամական հանրապետությունն իսկապես մեզ բարեկամ երկիր է, տարիներ շարունակ թե՛ մենք, թե՛ իրենք բազմիցս ապացուցել ենք բարիդրացիական տրամադրվածությունը միմյանց հանդեպ և վստահ եմ, որ որևէ խնդիր Իրանի հետ հարաբերություններում պաշտոնական Երևան չի ունենա , չի ստեղծի և ոչ էլ կա նման ռիսկեր»,-ասաց նա:
Ճիշտ հակառակը, շուտով լինելու է նախագահի այցն Իրան, վստահ եմ, որ այցի ընթացում նոր զարգացում և նոր ազդակներ կհաղորդվեն հայ-իրանական հարաբերությունների հետագա զարգացման և դա այն կուրսն է քաղաքական, որտեղ Հայաստանը շատ հետևողական է առաջ գնացել»,-ասաց նա:
Ինչ վերաբերում է Իսրայելի հետ հարաբերություններին, ապա Հրանտ Մելիք-Շահնազարյանը նշեց, թե կարծում է դեռևս ամեն ինչ դիվանագիտական էթիկայի սահմաններում է և ոչ ավելին: «Չեմ տեսնում այդ պետության հետ լուրջ հեռանկարներ, առավել ևս ռազմական ոլորտում, որովհետև հասկանում ենք, որ սա միայն հայ-իրանական հարաբերություններին չի վերաբերում, վերբերում է նաև իսրայել-ադրբեջանական հարաբերություններին, հայ-ռուսական հարաբերություններին և ընդհանրապես տարածաշրջանի շատ այլ կոնտակտներ խոչընդոտում են նման հարաբերությունների զարգացմանը ՀՀ-ի և Իսրայելի միջև»,-ասաց նա:
Քաղաքագետը նկատեց, թե առաջին հերթին հենց Իսրայելի շահը տարածաշրջանում, ցավոք, ավելի հակված է աջակցելու թուրքական գործոնի ուժեղացմանը, քան հայկական: «Դրա համար կարծում եմ այս հայտարարությունն հիմքում որևէ լուրջ զարգացման և համագործակցության խորացման հեռանկարներ չկան»,-ասաց նա:
Դիտարկմանը, թե ըստ այդմ՝ Իսրայելից զենք գնելու անհրաժեշտություն չկա, Մելիք-Շահնազարյանը պատասխանեց, թե ՀՀ-ն բոլոր տեղերից զենք գնելու անհրաժեշտություն ունի:
«Եթե որակը և գինը լավ են, կա անհրաժեշտություն, բայց դրա իրականացման մեխանիզմները բավական բարդ է պատկերացնել, որովհետև գիտեն, որ հակազդեցությունը մեծ է լինելու և եթե ընտրության հարց էլ լինի Իսրայելի առջև՝ որ շուկան պահի, հայկական, թե թուրք –ադրբեջանական, նախընտրելի կլինի թուրք-ադրբեջանականը»,-ասաց նա: