ԲՈւՀ-երի անփորձ շրջանավարտները դժվարանում են աշխատանք գտնել, պետք է հասկանալ՝ օրենսդրական բաց կա, թե ոչ. Արման Սաղաթելյան
Բարձրագույն ուսումնական հաստատությունների շատ շրջանավարտներ դժվարությամբ են աշխատանքային շուկայում իրենց տեղը գտնում, քանի որ գործատուների պարտադիր պահանջն աշխատանքային փորձն է. Tert.am-ի հետ զրույցում նման խնդրի մասին բարձրաձայնեց ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ Արման Սաղաթելյանը, ով այս խնդրին առնչվել է թե՛ որպես դասախոս ու ամբիոնի ղեկավար, թե՛ որպես գործատու։
«Միշտ հակասություն կա, երբ գործատուն պահանջում է պարտադիր աշխատանքային փորձ և դա աշխատանքի ընդունվելու նախապայման է դիտում այն դեպքում, երբ նորավարտ մասնագետն այդ փորձը ստանալու որևէ հնարավորություն չունի»,-ասաց նա:
ԱԺ պատգամավորը նշեց, թե հիմնականում ԲՈւՀ-երն ի վիճակի չեն աշխատանքային պահանջներին համապատասխան պրակտիկա ապահովել, քանի որ դա չվարձատրվող կամ ընդհանրապես որևէ մոտիվացիա չունեցող գործընթաց է: Ըստ նրա՝ գործատուն ինքը հասկանալիորեն հրաժարվում է ժամանակ ու ռեսուրս ծախսել ԲՈւՀ-ից ուղարկած ուսանողներին սովորեցնելու համար:
«Արդյունքում ունենք այն, ինչ ունենք՝ մի քանի հազար շրջանավարտ, որոնցից պահանջում են փորձ, ինչն իրենք չունեն, նույնիսկ եթե ԲՈւՀ-ն ավարտել են գերազանց առաջադիմությամբ»,-ասաց նա:
Սաղաթելյանը նշեց, թե փորձում է հասկանալ՝ այստեղ պետությունը, մասնավորապես՝ օրենսդիրն անելիք ունի՞, թե՞ խնդիրն այս կամ այն օղակների անգործության հետևանքով է:
«Ես չեմ պնդում, որ սա օրենքով կարգավորելու խնդիր ունի, ես ուզում եմ հասկանալ՝ ունի՞ թե ոչ, որովհետև որոշ քաղաքացիների արձագանքներ արդեն ստացել եմ»,-ասաց նա:
Արման Սաղաթելյանի խոսքով՝ որոշ բուհեր բավականին առաջադիմական մոտեցումներ ունեն և ինչ-որ չափով այս հարցը լուծում են առանց որևէ օրենսդրական միջամտությունների՝ իրենց կազմակերպչական ռեսուրսով, գործատուների միջև կապերով, հնարավորություններով, աշխատանքային լաբորատորիաներ ստեղծելով, և այլն:
«Տարբեր բուհեր, տարբեր լուծումներ տվել են, կան բուհեր, որոնց մոտ լավ է ստացվում, կան՝ ոչ այդքան կամ չի ստացվում ընդհանրապես»,-ասաց նա: