Алматыда жұлдыздар қатысқан шара: тағы бірнеше блогер жазаланды
Алматының Санитарлық-эпидемиологиялық бақылау қызметі Royal Tulip Almaty қонақүйінде өткен шараға қатысқан тағы бес танымал адамға, оның ішінде актерлер мен вайнерлерге хаттама жасады, - деп хабарлайды Tengrinews.kz тілшісі.
Алматы қаласы Санитарлық-эпидемиологиялық бақылау департаменті мәліметінше, карантинді бұзу бойынша Медеу ауданының Санитарлық-эпидемиологиялық бақылау дирекциясы учаскелік полициямен бірге қатысушыларды анықтау бойынша жұмыстар жүргізген.
Вайнерлер Мейіржан Төребаев пен Дана Есееваға, әнші және актриса Рано Умароваға, продюсер Ләззат Биғалиева мен шоумен Кирилл Мейстерге қатысты ҚР ӘҚБтК-нің 425-бабы бойынша әкімшілік құқық бұзушылық туралы хаттама жасалды.
Бұл бап бойынша оларға 30 АЕК (87 мың теңге) көлемінде айыппұл салынады.
Еске салайық, 8 тамызда Royal Tulip Almaty қонақүйінде Black Star Burger ашылғаны хабарланған болатын. Оған қазақстандық жұлдыздар қатысқан.
Іс-шараны ұйымдастырушы "Е.М Құлтасов" жеке кәсіпкерлігі, қонақүй менеджері, әнші Луина мен оның күйеуіне айыппұл салынған. Кейін әнші Бүркітке де хаттама толтырылғаны белгілі болды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!