ოპერის თანამშრომლების გაფიცვა მე-12 დღეა გრძელდება
ზუსტად ახლა, როცა თანამშრომლების ნაწილი გაფიცულია და შენობის წინაა შეკრებილი, თეატრში ლუდვიგ მინკუსის ბალეტის "ბაიადერას" პრემიერა იმართება.
თანამშრომლებმა გაფიცვა 3 ნოემბერს დაიწყეს, მას შემდეგ, რაც უშედეგოდ გავიდა მედიაციისთვის გამოყოფილი 21 დღე. თანამშრომელთა გაფიცვის დაწყებას რამდენიმე საათის შემდეგ განცხადებით უპასუხა ოპერისა და ბალეტის თეატრმა. თეატრი მზად არის, რომ მომავალი წლის 1 იანვრიდან ხელფასები 35-40 პროცენტით გაზარდოს.
"სამწუხაროდ, შრომის ანაზღაურების ზემოაღნიშნული პროცენტული ზრდა თეატრის სცენის სამსახურში დასაქმებული პირებისათვის არ აღმოჩნდა მისაღები, რის გამოც, მოცემული ტექნიკური პერსონალის ერთმა ნაწილმა", - ეწერა 3 ნოემბერს გავრცელებულ განცხადებაში.
თეატრი აღნიშნავდა, რომ "გაფიცულ თანამშრომელთა მიმდინარე ყოველთვიური შრომის ანაზღაურების მინიმალური ოდენობა შეადგენს 650 ლარს, მაქსიმალური - 1100 ლარს". ამ განცხადებაში არ არის დაკონკრეტებული, ეს არის "ხელზე ასაღები" თანხა, თუ აკლდება გადასახადები.
„ღირსეული შრომის პლატფორმამ“ 4 ნოემბერს განცხადება გაავრცელა, სადაც ნათქვამია, რომ სოლიდარობას და მხარდაჭრას უცხადებენ თბილისის ზაქარია ფალიაშვილის სახელობის ოპერისა და ბალეტის თეატრის სადადგმო ნაწილის თანამშრომლების გაფიცვას.