რუსეთი აცხადებს, რომ აღკვეთა დრონებით შეტევა ტულისა და ბელგოროდის რეგიონებში
"უპილოტო საფრენი აპარატები გაანადგურეს ტულის რეგიონის ტერიტორიაზე მორიგეობაზე მყოფმა საჰაერო თავდაცვის სისტემებმა", - ნათქვამია ანგარიშში.
რუსეთის სამხედრო უწყებას არ დაუკონკრეტებია, თუ რა შედეგები მოჰყვა დრონების განადგურებას დასახლებული პუნქტებისათვის.
სააგენტო „რია ნოვოსტის“ ინფორმაციით, მოსკოვის ვნუკოვოსა და დომოდედოვოს აეროპორტებმა სამშაბათს დილით ადრე შეზღუდეს ფრენები.
28 აგვისტოს საღამოს სააგენტომ ბელგოროდის რეგიონის თავზე ჩამოგდებული თვითმფრინავების შესახებ განაცხადა. ნგრევისა და ზიანის შესახებ ცნობები არ გავრცელებულა.
როგორც რუსეთის სამხედრო უწყების ანგარიშიდან ჩანს, პირველი თვითმფრინავის ტიპის დრონის დაახლოებით 21:00 საათზე, მეორე - დაახლოებით 23: 00 საათზე ჩამოაგდეს. უპილოტო საფრენი აპარატის მიზანს წარმოადგენდა „რუსეთის ფედერაციის ტერიტორიაზე განლაგებული ობიექტები".
ერთი კვირის წინ რუსეთის ტერიტორიაზე უპილოტო საფრენი აპარატებით მორიგი შეტევა იყო - მოსკოვის და ბრიანსკის ოლქებზე. რუსული ტელეგრამ-არხების ცნობით, მოსკოვთან აფეთქებები გამთენიისას მოხდა. აფეთქების შედეგად მოსკოვის ოლქის კრასნოგორსკის რაიონში დაზიანებულია 25-სართულიანი სახლის ფასადი და ფანჯრები.
ბოლო რამდენიმე თვეა, გახშირდა რუსეთის ტერიტორიაზე, მათ შორის მოსკოვზე, უპილოტო საფრენი აპარატებით შეტევა. კიევი ამ თავდასხმებთან კავშირს ოფიციალურად არც ადასტურებს და არც უარყოფს. ამასთან, უკრაინის ხელისუფლებაში არაერთხელ განაცხადეს, რომ რუსეთს მის მიერ გაჩაღებული ომი დაუბრუნდა.