ახალგაზრდა, რომელიც პოლიციის მხრიდან ძალადობაზე საუბრობს, სპეციალურ საგამოძიებო სამსახურში იკითხება
21 წლის ლაშა ჟღენტი, რომელიც აცხადებს, რომ მასზე თბილისში, გოგებაშვილის ქუჩაზე, პოლიციამ იძალადა, სპეციალურ საგამოძიებო სამსახურში გამოკითხვაზე მივიდა. უწყებამ, რომელიც სამართალდამცველების მხრიდან უფლებამოსილების გადამეტების ფაქტებს იძიებს, გამოძიება ამ საქმეზე მედიაში ინფორმაციის გავრცელების შემდეგ დაიწყო.
ლაშა ჟღენტი ძალადობასა და დამამცირებელ მოპყრობაში ადანაშაულებს იმ პოლიციელებს, რომლებმაც ის გასაჩხრეკად ძმასთან ერთად გააჩერეს სახლის სიახლოვეს.
„მოინდომეს ზედაპირული გაჩხრეკა და მაგ დროს „ტრუსიც“ გამოწიეს. ვხვდები, რომ ზედაპირულად გაჩხრეკა შეუძლიათ, მაგრამ როცა „ტრუსი“ გამოწიეს, ვუთხარი, რომ ხელი გაეწიათ. თურმე სიტყვები „ხელის გაწევა“ პოლიციისთვის შეურაცხყოფის მიყენებაა და პოლიციას ეგრე არ უნდა ვესაუბრო. [პოლიციის] მანქანაშიც მგუდავდნენ. მანქანაში რომ მტენიდნენ, ხომ არ დავეგდებოდი და ვეტყოდი, ძალით ჩამტენეთ-მეთქი. მანქანაში რომ ჩამსვეს და ბორკილები დამადეს, მანქანაშიც მირტყეს თავში“, - უთხრა „მთავარ არხს“ 20 ივლისს ლაშა ჟღენტმა.
პოლიციის მხრიდან ძალადობაზე ლაპარაკობს მისი ძმაც, ლუკა ჟღენტი.
"ცოტა აგრესიულებიც იყვნენ და ჩემს ძმას რომ ამოწმებდნენ, სასქესო ორგანოზე შეეხნენ და [უთხრა, რომ] გაიწიე, რას მითათუნებ [ხელსო]. ამათ [პოლიციელებმა უთხრეს], შენ რა გონორზე ხარ, მაგის უფლება გვაქვსო… ახრჩობდნენ, ურტყამდნენ… იმის საშუალებაც არ გვქონდა, რომ ვიდეო გადაგვეღო… მეთქი, ჯიბეში რამე არ ჩაუდონ… ბებიაჩემიც მოვიდა მერე და ისიც 3 მეტრი აფორთხიალეს“, - ასე აღუწერა ჟურნალისტებს მომხდარი ლუკა ჟღენტმა.
ახალგაზრდების დედამ კი ფეისბუკზე დაწერა, რომ მომხდარის შემდეგ სასწრაფო სამედიცინო დახმარება დასჭირდა ბიჭების 76 წლის ბებიას, რომელიც პოლიციელების მხრიდან ძალადობას შეესწრო. სოფი გამცემლიძემ დღეს, 21 ივლისს, სპეციალურ საგამოძიებო სამსახურში შესვლამდე "მთავარ არხს" უთხრა, რომ სახელმწიფოს ჰქონდა მისი და მისი შვილების გაჩუმების მცდელობა. ამბის გახმაურების შემდეგ, მისი თქმით, მას დაუკავშირდა რამდენიმე ადამიანი და უთხრა, რომ თუ გაჩუმდებოდნენ და მისი შვილები ბოდიშს მოიხდიდნენ, ყველაფერს აპატიებდნენ.
"გუშინ პოლიციელებმა ძალას გადაამეტეს, წიხლებით და ცემა-ტყეპით ჩატენეს უდანაშაულო ბავშვები მანქანაში... რამდენიმე ზარი შემოვიდა ჩემს ტელეფონზე, რომ გავჩერდეთ. ბოდიშის მოხდით ყველაფერს აპატიებენ ბავშვებს. ჩვენ არ გავჩერდებით, ვინც არ უნდა დარეკოს. ჩემი შვილები არიან უდანაშაულოები", - ამბობს ლაშა ჟღენტის დედა. სოფი გამცემლიძის თქმით, მან პოლიციელებს მოსთხოვა სამხრე კამერების ჩანაწერები, რომლებშიც მისი შვილების დაკავება და ჩხრეკა უნდა იყოს ასახული და პასუხად მიიღო, რომ ასეთი ჩანაწერები არ არსებობს.
სპეციალურ საგამოძიებო სამსახურში გამოკითხვის შემდეგ ახალგაზრდა კაცს, სავარაუდოდ, ექსპერტიზა ჩაუტარდება სხეულზე მიყენებული დაზიანებების გამოსაკვლევად.
სპეციალურმა საგამოძიებო სამსახურმა გამოძიება საქართველოს სისხლის სამართლის კოდექსის 333-ე მუხლის მე-2 ნაწილის "ბ" ქვეპუნქტით დაიწყო, რაც სამსახურებრივი უფლებამოსილების ძალადობით გადამეტებას გულისხმობს. ეს დანაშაული, დამტკიცების შემთხვევაში, ისჯება ჯარიმით ან თავისუფლების აღკვეთით, ვადით სამიდან ხუთ წლამდე; თანამდებობის დაკავების ან საქმიანობის უფლების ჩამორთმევით, ვადით სამ წლამდე.
სპეციალური საგამოძიებო სამსახურის 2022 წლის ანგარიშის მიხედვით, გასულ წელს სამსახურებრივი უფლებამოსილების ძალადობით გადამეტებისთვის სისხლისსამართლებრივი დევნა დაიწყო მხოლოდ 3 პოლიციელის მიმართ - ამ მუხლით გამოძიება დაიწყო 160-ზე მეტ შემთხვევაში.