"ისლამურმა სახელმწიფომ" პასუხისმგებლობა იკისრა ქაბულში მომხდარ აფეთქებაზე
"ისლამური სახელმწიფო" ამ განცხადებით გამოვიდა 25 დეკემბერს, ტელეგრამის მასთან დაკავშირებული არხით. თალიბანის წარმომადგენლები აცხადებდნენ, რომ პირი, რომელიც თავის აფეთქებას გეგმავდა, უშიშროების ძალებმა მოკლეს, როცა საპასპორტო ოფისში შედიოდა. ინციდენტის დეტალები გაურკვეველია, თუმცა არის დაუდასტურებელი ცნობები, რომ შენობის შესასვლელთან აფეთქება მოხდა, რის შედეგადაც დაიჭრა რამდენიმე ადამიანი.
ბოლო დღეებში, მას შემდეგ, რაც საპასპორტო ოფისმა პაუზის შემდეგ მუშაობა განაახლა, მის წინ ბევრი ხალხი იყრიდა თავს, სამოგზაურო დოკუმენტების მიღების მიზნით. ხუთშაბათობით პასპორტის აღება მხოლოდ თალიბანის წევრებს და ჯარისკაცებს შეუძლიათ, დიდი მოთხოვნის და რიგების პირობებში. თავდასხმა მოხდა ხუთშაბათს, როცა საპასპორტო ოფისთან დილიდან თალიბანის 200-მდე სამხედრო იყო თავმოყრილი.
"ისლამური სახელმწიფოს" ადგილობრივმა დანაყოფმა, "ისლამურმა სახელმწიფო - ხორასანმა" ავღანეთში გაახშირა თავდასხმები მას შემდეგ, რაც იქ აგვისტოში თალიბანი მოვიდა ხელისუფლებაში. მათი თავდასხმების ძირითადი სამიზნეებია თალიბანის მებრძოლები და შიიტთა უმცირესობის წარმომადგენლები. თავდასხმების შედეგად დაიღუპა და დაიჭრა ასობით ადამიანი.