ქუთაისელი სამოქალაქო აქტივისტი ზალიკო კუხიანიძე კვლავ იზოლატორში რჩება
მისი ადვოკატმა ვალერი თევდორაძემ რადიო თავისუფლებას უთხრა, რომ ზალიკო კუხიანიძე დაკავებულია ადმინისტრაციული კოდექსის 173-ე მუხლით, რაც პოლიციის მხრიდან სამართლიან მოთხოვნაზე დაუმორჩილებლობას გულისხმობს.
ადვოკატის განცხადებით, პოლიციამ დღეს დილით, 10 საათზე შეიტანა განცხადება წინასწარი დაკავების იზოლატორში, რომ დაკავებულს იზოლატორში ყოფნა კიდევ 24 საათით გაუხანგრძლივონ.
„ხვალ ვალდებულები იქნებიან, ჩანიშნონ სასამართლო სხდომა. ზალიკო კუხიანიძე ფიზიკურად მხნედ არის და ელოდება ხვალინდელ პროცესს. იმედი მაქვს, რომ რაიმე ექსცესი არ მოხდება“.
ვალერი თევდორაძე რადიო თავისუფლებასთან საუბარში შენიშნავს, რომ ბოლო დროს, სიმპტომური გახდა ის ფაქტი, რომ მსგავსი მუხლით დაკავებულებს 24 საათის ნაცვლად, იზოლატორში 48 საათს აყოვნებენ:
„ეს ალბათ ინსტრუქციაა“, - აცხადებს ვალერი თევდორაძე.
3 დეკემბერს, ახალი საკრებულოების პირველი სხდომის გამართვის პარალელურად, საქართველოს არაერთ ქალაქში გაიმართა საპროტესტო აქცია. მათ შორის, ქუთაისშიც, სადაც სამოქალაქო აქტივისტები კრიტიკული პლაკატებით ხელში მივიდნენ საკრებულოებთან.
„ხმების ქურდებს სიცოცხლე“, „კარუსელი 41“, „გაბათილება ჩემზე იყო“, - ამ ლოზუნგებით ხელში, ქუთაისის საკრებულოს სხდომის დაწყებამდე სამოქალაქო აქტივისტებმა საკრებულოს შენობის წინ საპროტესტო აქცია გამართეს - ისინი ქუთაისში 2021 წლის თვითმმართველობის არჩევნების შედეგებს აპროტესტებდნენ.