"Озодлик" собиқ президентлари Байденни матбуот эркинлигини ҳимоя қилишга чорлади

Озодлик радиосининг беш нафар собиқ президенти АҚШнинг сайланган президенти Жо Байденга мурожаат қилиб, 20 январь куни бўлиб ўтадиган инаугурациядан кейин АҚШ Глобал медиа агентлиги (USAGM) раҳбари Майкл Пакни ишдан бўшатишга чорладилар.

Шунингдек, улар Байденни АҚШ федерал ҳукумати молиялаштирадиган халқаро нашрлар «дахлсизлигини таъминлаш» учун бошқа чораларни кўришга чақиришди.

Озодликнинг собиқ раҳбарлари 8 январь куни Байденга йўллаган мактубда Пак «кадрлар ва сиёсий йўналиш бўйича кўрган чоралар дастурларга мафкуравий тус беришни ҳамда қатъий давлат ва сиёсий назоратини жорий этишни кўзлагани» айтилади.

АҚШ Глобал медиа агентлиги Америка овози, Озодлик радиоси, Озод Осиё. Куба ҳамда Яқин Шарқ радиоэшиттириш тармоқларини назорат қилади.

Пак АҚШ Президенти Дональд Трамп даврида агентликнинг бош директори этиб тайинланган ва 2020 йилнинг июнь ойида ушбу лавозимини эгаллаган.

Озод Европа/Озодлик радиосининг 23 хизмати бош муҳаррирлари АҚШ глобал медиа агентлиги – USAGAM бош директори Майкл Пакка 2020 йилнинг 30 декбарида норозилик мактубини жўнатган эди.

Мактубда агентлик раҳбари икки партиявийлик принципидан “мисли кўрилмаган даражада воз кечганликда” ва “ўзи ҳимоя қилиши шарт бўлган оммавий ахборот воситаларининг мустақиллигига даҳл қилганликда” айбланди.

30 декабрда ёзилган ва Озод Европа/Озодлик таҳририяти кенгашининг 7 аъзоси ва радио хизматларининг раҳбарлари томонидан имзоланган мактуб нусхаси Сенатга, Вакиллар палатасига ва сайланган президент Жо Байденнинг ўтиш даври маъмурияти раҳбарига ҳам жўнатилди.

Майкл Пак CNBCга мазкур мактуб юзасидан муносабат билдирар экан, ўзи томонидан омавий ахборот воситалари эркинлигига даҳл қилинганини инкор этди.

“Менинг барча ҳаракатларим ўз мажбуриятларимни ва Конгресс томонидан белгилаб берилган USAGM миссиясини бажариш доирасида бўлди”,-деди Пак.