Афғонистонда ИД қўмондонларидан бири ўлдирилди
Афғонистон ҳукумати Нангарҳор вилоятида “Ислом давлати” гуруҳи қўмондонларидан бири ўлдирилганини билдирди.
Расмий маълумотга қараганда, “Ислом давлати” гуруҳи қўмондони Абу Саад Эрҳобий ва унинг 25 нафар жанггариси 25 август куни Афғонистон ва НАТО қўшинларининг қўшма амалиёти пайтида отиб ўлдирилган.
26 августда эълон қилинган хабарда айтилишича, жанггариларнинг оғир ва енгил қуроллари, ўқ-дори заҳиралари ҳам йўқ қилинган.
“Ислом давлати” гуруҳғининг Amaq агентлиги ҳозирча бу хабарга ўз муносабатини билдиргани йўқ.
“Ислом давлати” гуруҳининг Хуросон катибаси Покистон билан чегарадош бўлган Нангарҳор вилоятида қарор топган. АҚШ маълумотига асосан бу катибанинг икки мингга яқин жанггариси бор.