Рим папаси черковдаги бачабозлик учун католиклардан яна бир бор узр сўради
Рим папаси 26 август куни Ирландиянинг Кнок шаҳрига қилган сафарида сўзлаган ибодат нутқида католиклардан черковдаги бачабозлик ҳолатлари учун яна бир бор узр сўради.
-Зўравонликка дучор бўлиб номусидан айрилган ёки оналаридан айриб олиниб етимхоналарга жойлаштирилган балоғатга етмаган болалар тўғрисидаги ҳикоялар ҳеч биримизни бефарқ қолдирмайди. Бу очиқ яра барчамизни адолат қарор топиши учун қатъий ва шижоатли бўлишга ундайди. Бу гуноҳлар ва черковдаги жанжалга сабаб бўлган воқеалар учун Худога тавба қиламан,-деди Рим папаси.
Рим папаси Франциск 20 августда илк маротаба Рим-католик черковида бачабозлик мавжудлигини тан олди ва жамоатчиликдан узр сўраган эди.
15 август куни АҚШнинг Пенсильвания штати Ҳакамлар коллегияси 1950 йилдан бошлаб то шу кунгача католик черковининг 300 нафар руҳонийси штатнинг 6та епархиясида бир минг нафардан кўпроқ болаларни жинсий алоқа қилиб зўрлагани тўғрисидаги ҳужжатни эълон қилган эди.
26 август куни Рим папаси Ирландияга учиб кетиш арафасида журналистларга берган суҳбатида экс-кардинал Теодор МакКаррикнинг жинсий алоқалари тўғрисидаги айбловларни “босди-босди” қилгани тўғрисидаги маълумот юзасидан “бирон оғиз ҳам гапирмаслиги”ни айтди.
Аввалроқ Ватиканнинг Вашингтондаги элчиси бўлган архиепископ Карло Марии Вигано бу борада 11 саҳифали баёнотни эълон қилган ва Папанинг истеъфосини талаб қилган эди.