Дар Душанбе марафони дав бахшида ба Даҳсолаи байналмилалии "Об барои рушди устувор" доир шуд
Рӯзи 4-уми июн дар шаҳри Душанбе дар ҳошияи Конфронси дуюми сатҳи баланд оид ба Даҳсолаи байналмилалии амал «Об барои рушди устувор”, инчунин дар доираи чорабиниҳо ба муносибати Рӯзи байналмилалии олимпӣ марафони дав баргузор шуд.
Ба иттилои Кумитаи миллии олимпии Тоҷикистон, марафон дар масофаи 42,2 километр бо иштироки шаҳрванди Австралия Мина Гулӣ аз истироҳатгоҳи “Сароб”-и ноҳияи Варзоб оғоз гардида, дар “Наврӯзгоҳи пойтахт” хотима ёфт.
Дар масофаи рамзии 6-километрии марафон кормандони соҳаи варзиш, сокинони шаҳри Душанбе ва шаҳрвандони кишварҳои хориҷӣ иштирок карданд.
Мина Гулӣ дар доираи марафони ҷаҳонии об, ки 22-юми март оғоз гардид, дар Тоҷикистон бо баргузории беш аз 9 марафон қад-қади дарёҳои Зарафшон, Омӯ, Панҷ, Ванҷ ва Варзобро тай кардааст.
Марафони ҷаҳонии дав то моҳи марти соли 2023, қабл аз Конфронси Созмони Милали Мутатҳид оид ба захираҳои об дар Ню-Йорк, дар дигар минтақаҳои ҷаҳон идома меёбад.
Ба Мина Гулӣ аз номи Ҳукумати Тоҷикистон ва шаҳрдории Душанбе туҳфаҳои хотиравӣ супорида шуд.
Ҳамчунин дар доираи Конфронси оби Душанбе 9-уми июн Марафони дуюм дар самти Душанбе - Ваҳдат (минтақаи Ромит) ба масофаи 42,2 км баргузор хоҳад шуд.
Натиҷаи марафонҳо дар Конфронси дуюми Душанбе ва инчунин Конфронси СММ оид ба захираҳои об моҳи марти соли 2023 баррасӣ хоҳад шуд.
Зимнан, марафони ҷаҳонии об “RUN BLUE” 22-юми март дар Рӯзи байналмилалии об дар Австралия оғоз ёфт. “RUN BLUE” 200 марафонро дар саросари ҷаҳон дар бар мегирад, ки беш аз 200 миллион нафарро ҷалб мекунад ва 22-юми марти соли 2023 қабл аз Конфронси СММ дар Ню-Йорк ба охир мерасад.
Ҳадаф аз баргузории марафонҳо ҷалби таваҷҷуҳи ҷомеаи ҷаҳонӣ ба масъалаи рӯзафзуни об, саъю кӯшиш барои ноил шудан ба тағйироти воқеӣ дар замин ва пешбурди Даҳсолаи байналмилалии амал ва Конфронси СММ оид ба захираҳои об дар соли 2023 мебошад.
Марафонҳо аз ҷониби фаъол ва даванди Австралия Мино Гулӣ созмон дода шуда, аз ҷониби бисёр шарикон, аз ҷумла ҳукуматҳои Тоҷикистон ва Нидерланд ҳамчун ҳамраиси конфронс дастгирӣ мешавад.
Бахши Осиёи Марказии “RUN BLUE”, ки 10-уми май дар шаҳри Мӯйноқи Узбекистон оғоз шуд, 10-уми июн дар Душанбе ба охир мерасад. Дар Тоҷикистон 11 марафон ба дарозии 458,2 километр дар соҳили дарёи Омӯ ва шохобҳои он доир мегардад.
Аз ҷумла, Мина Гулӣ бо ҳайати ҳамроҳонаш 16-уми май дар самти Панҷакент – Айнӣ – Душанбе (42,2 километр), 18-уми май дар масири Шаҳритус - Носири Хусрав (42,2 километр), 20-уми май дар масири Фархор-Ҳамадонӣ (42,2 километр), 22-юми май дар масири ноҳияи Шамсиддин Шоҳин – Зиғар (42,2 километр), 24-уми май дар масири деҳаи Зиғар – маркази ноҳияи Дарвоз (42,2км), 26-уми май дар ноҳияи Ванҷ, қад-қади дарёи Ванҷ (42,2км), 27-уми май дар самти Ванҷ – Рӯшон (42,2км) ва 30-юми май дар самти Душанбе-Лахш (42,2) марафон анҷом дод.