ხადის ხეობის მოსახლეობას უფასო სამედიცინო პროფილაქტიკური შემოწმება ჩაუტარდა
ქვეშეთი-კობის ახალი გზის პროექტის მხარდაჭერითა და ორგანიზებით,
ადგილობრივი მოსახლეობის მხარდაჭერისა და სოციალური დაცვის პროგრამის
ფარგლებში, ხადის ხეობის მოსახლეობის უფასო სამედიცინო პროფილაქტიკური
შემოწმება გრძელდება.
17 ნოემბერს, უკვე მესამედ, ხადის ხეობას კლინიკა „რემედიქალის“ სხვადასხვა
პროფილის ექიმები ეწვივნენ და მთელი დღის განმავლობაში, ქვეშეთის
ამბულატორიულ ცენტრში მსურველებს კონსულტაციას უწევდნენ. უფასო
კონსულტაციები ჩაატარეს შემდეგი პროფილის ექიმებმა: ტრიაჟის ექიმი,
თერაპევტი, კარდიოლოგი, ენდოკრინოლოგი, ნევროლოგი, ზოგადი ქირურგი,
სისხლძარღვთა ქირურგი, ექიმი-ექოსკოპისტი.
ქვეშეთის ამბულატორიული ცენტრი მომარაგებული იყო სხვადასხვა
მედიკამენტითაც, რომლებიც, საჭიროების მიხედვით გადაეცათ ადგილობრივებს.
„ქვეშეთი-კობის ახალი გზის პროექტის ფარგლებში, სამედიცინო ამბულატორიულ
შემოწმებას ხადის ხეობის მოსახლეობისთვის უკვე მესამედ ვატარებთ. ზოგადად,
პროექტის ფარგლებში, მსგავსი სახის სოციალური აქტივობები ხშირად
ხორციელდება. ხადის ხეობაში მცხოვრებ მოსახლეობას, უგზოობისა და ზამთარში
დიდთოვლობის გამო, არ აქვს წვდომა ისეთ სერვისებზე, როგორიცაა სამედიცინო
მომსახურება, აფთიაქი და ა.შ. შესაბამისად, მსგავსი სახის აქტივობები
მნიშვნელოვანია, რათა მოსახლეობას პროექტის ფარგლებში დამატებითი
სარგებელი მიეცეს“, – აცხადებს საავტომობილო გზების დეპარტამენტის
თავმჯდომარის მოადგილე, სალომე წურწუმია.
პაციენტებთან, რომლებმაც ქვეშეთის ამბულატორიაში მოსვლა ჯანმრთელობის
პრობლემების გამო ვერ მოახერხეს, ექიმები თავად მივიდნენ და კონსულტაცია
გაუწიეს.
„საქართველოს რეგიონების მოსახლეობის უფასო გასინჯვას ლოზუნგით – &ერთად
ვიზრუნოთ ჯანმრთელობაზე! – რეგულარულად აწარმოებს კლინიკა “რემედიქალი”.
მათი სამედიცინო საჭიროებების გაცნობა და ადგილზე მაქსიმალური დახმარების
გაწევა მნიშვნელოვანია ჩვენი საექიმო გუნდის ყველა წევრისთვის“, – ამბობს კლინიკა “რემედიქალის” კლინიკური მენეჯერი, მედიცინის დოქტორი თეა
გამეზარდაშვილი.
ჯამში აქციაში მონაწილეობა 70-ზე მეტმა ბენეფიციარმა მიიღო. ბენეფიციარები
გამოვლინდნენ წინასწარი კვლევით, რომელიც ხადის ხეობაში „რეგიონული
განვითარების ახალგაზრდულმა ცენტრმა“ ჩაატარა.
აღნიშნული აქცია პენსიონერების მხარდაჭერის პროგრამის ნაწილია, რომელიც
საქართველოს მთავრობის ადმინისტრაციის რეგიონებთან ურთიერთობის
დეპარტამენტის უშუალო ჩართულობით განხორციელდა.