ირაკლი კობახიძე: კრიტიკა მოდის კონკრეტული ადამიანებისგან, რასაც ჩვენთვის ფასი ვერ ექნება

ერთი და იგივე ადამიანები 2012 წლამდე იყვნენ „ნაცმოძრაობის“ მეგობრები და 2012 წლის შემდეგაც არიან „ნაცმოძრაობის“ მეგობრები – მაგალითად, ცნობილი და ოდიოზური კუბილიუსი, რომელიც მხარს უჭერდა კრიმინალურ რეჟიმს და დღეს აგრძელებს „ნაცმოძრაობის“ მხარდაჭერას, იგივე ეხება ფოტიგას, რასას, – ამის შესახებ „ქართული ოცნების“ თავმჯდომარემ, ირაკლი კობახიძემ „პალიტრანიუსის“ გადაცემა „თავისუფალ სტუდიაში“ განაცხადა, რითაც გამოეხმაურა შეკითხვას იმის შესახებ, რომ ბოლო დროს დასავლეთში გახშირდა კითხვები და შეფასებები იმასთან დაკავშირებით, რომ „ქართული ოცნების“ ხელისუფლება ასცდა დასავლურ კურსს.

კობახიძის შეფასებით, ეს კრიტიკა არის აბსოლუტურად უსამართლო.

“ეს კრიტიკა მოდის კონკრეტული ადამიანებისგან, ასეთ კრიტიკას ჩვენთვის ფასი ვერ ექნება. თუ კრიტიკა არ არის დასაბუთებული და არგუმენტირებული, ასეთ კრიტიკას რაიმე განსაკუთრებულ მნიშვნელობას ვერ მივანიჭებთ. ჩვენ გვჭირდება არგუმენტები ყველაფერთან დაკავშირებით.

ესენი არიან ერთი და იგივე ადამიანები, რომლებიც 2012 წლამდე იყვნენ „ნაცმოძრაობის“ მეგობრები და 2012 წლის შემდეგაც არიან „ნაცმოძრაობის“ მეგობრები. მაგალითად, ცნობილი და ოდიოზური კუბილიუსი, რომელიც იყო ამ პარტიის მეგობარი 2012 წლამდე, მხარს უჭერდა კრიმინალურ რეჟიმს და დღეს აგრძელებს „ნაცმოძრაობის“ მხარდაჭერას. იგივე ეხება ფოტიგას, რასას და ა.შ. რაც შეეხება ჩვენს კურსს – ყველაფერი უნდა შეფასდეს გადადგმული ნაბიჯებით. წინა ხელისუფლება სადაც მიდიოდა, საზოგადოებამ უკვე შეაფასა, ჩვენი ხელისუფლება კი სად მიდიოდა ეს 10 წელი, ესეც ნაბიჯებით უნდა შეფასდეს. ნაბიჯები კი მიანიშნებს იმაზე, რომ ჩვენ მივდივართ იქ, სადაც უნდა ქართულ საზოგადოებას – ეს არის ევროპული ინტეგრაცია, დემოკრატიული სისტემის განმტკიცება, ეს არის ეკონომიკის ზრდა ორნიშნა მაჩვენებლით და ა.შ. – აქეთ მივდივართ ჩვენ“, – განაცხადა ირაკლი კობახიძემ.

ამასთან, მან ისაუბრა ევროკომისიის მიერ წარდგენილი 12 რეკომენდაციის შესრულების შესახებ. როგორც კობახიძემ აღნიშნა, მმართველი გუნდი აქამდე წარდგენილ გეგმას ზუსტად მიყვება.

„12 პუნქტის შესრულებაზე – ყველა მიმართულებით ჩვენ გვქონდა წარდგენილი ჩვენი გეგმა თავისი ვადებით, ფორმატებით და ზუსტად მივყვებით ამ გეგმას.

უკვე დეკემბრის დასაწყისში ყველა მიმართულებით კანონმდებლობა იქნება დამტკიცებული. დღეს, მაგალითად, გვქონდა ორი კანონპროექტის განხილვა – ეს იყო დეოლიგარქიზაციის კანონი და ანტიკორუფციული კანონმდებლობა და მეორე მოსმენით დავამტკიცეთ.

ასევე არის საკითხი, სადაც დამოკიდებული ვართ ოპოზიციის თანამონაწილეობაზე – ეს არის ომბუდსმენის არჩევა და იუსტიციის საბჭოს წევრების არჩევა. რაც შეეხება რეფორმებს, ისინი სათანადო ვადებში ხორციელდება. ველოდებით ვენეციის კომისიის დასკვნებს საარჩევნო რეფორმასა და სასამართლო რეფორმასთან დაკავშირებით“, – განაცხადა ირაკლი კობახიძემ.