გიორგი ონიანი:  კახა კალაძე რა გადაწყვეტილებას მიიღებს ეს მხოლოდ მისი პირადი „მე“-ს, მისი მორალის და მისი პირადი პასუხისმგებლობაა

როდესაც მერის ლექსიკაა „აქედან გამოექანეთ“, „იქიდან გამოექანეთ“, რა თქმა უნდა, ის ვერ მოიცლის საქმისთვის და საქმე ვერ გაკეთდება ისე, რომ ჩვენი შვილები, ჩვენ დაცულები ვიყოთ და ქალაქი ქალაქს დაემსგავსოს, – ამის შესახებ თბილისის საკრებულოში ფრაქცია „ნაციონალური მოძრაობის“ თავმჯდომარის მოადგილემ გოგა ონიანმა „პალიტრანიუსის“ გადაცემაში „დღის ნიუსრუმი“ განაცხადა.

როგორც ონიანმა ვაკის პარკში გუშინ მომხდარი ტრაგედიის შეფასებისას აღნიშნა, სამუშაოების შეუსრულებლობის მიზეზი თავგასულობა და კორუფციაა.

„ამ ტრაგედიამ მთელი საქართველო ერთმანეთის ჭირისუფალი გაგვხადა. კახა კალაძე გადადგება თუ არ გადადგება არც ეს არის საზოგადოების წუხილი. კახა კალაძე რა გადაწყვეტილებას მიიღებს ეს მხოლოდ მისი პირადი „მე“-ს, მისი მორალის და მისი პირადი პასუხისმგებლობაა. თუკი ბატონი კახა კალაძე თვლის, რომ არაფერ შუაში არ არის და არანაირ შემხებლობაში არ არის ამ გოგონას გარდაცვალებასთან, ეს მხოლოდ მისი პასუხისმგებლობაა, საზოგადოებას, პოლიტიკოსებს და ოპოზიციას ამისთვის ახლა არ სცალია“, – განაცხადა ონიანმა.

ოპოზიციონერმა პოლიტიკოსმა გადაცემაში ასევე ისაუბრა კომპანია „გრინსერვის +“-ის პასუხისმგებლობაზეც და აღნიშნა, რომ, როგორც ჩანს, კომპანიის ხელმძღვანელს ლაშა ფურცხვანიძეს ჰქონდა იმის გარანტია, რომ თუ ასეთი ფაქტი არ მოხდებოდა, მას უხარისხოდ შესრულებულ სამუშაოზე პასუხს არავინ მოსთხოვდა.

ამასთან, ონიანმა აღნიშნა, რომ სამწუხაროდ, მსგავსი შემთხვევები მანამდე მოხდება, ვიდრე ქალაქის ხელმძღვანელობა არ გაიაზრებს, რომ კანონით დაკისრებული ვალდებულება უნდა შეასრულოს.

„დაახლოებით, 2 კვირის წინ საცობებთან დაკავშირებით საკრებულოში ვიბარებდით ბატონ წილოსანს, მანამდე ბატონ ხმალაძეს უკანონო მშენებლობებთან დაკავშირებით. გახსოვთ მაშინ კალაძის პასუხი? – ჩემი მოადგილე მოვა მაშინ, როცა ამას მე გადავწყვეტო. როცა კანონს არას დაუდევ და იმ დონეზე ხარ გასული მომსახურების დონიდან, რომ საზოგადოებას ეუბნები მე თუ არ გადავწყვეტ, მიუხედავად იმისა, კანონით მას ევალება თუ არა მისვლა საკრებულოში, ჩემი მოადგილე არ მივა ოპოზიციის დაბარებულზეო, ასეთი შემთხვევა სამწუხაროდ, მოხდება. „მე ვარ და ჩემი ნაბადი“, ყველაფერი ჩემი მეგობრებისთვის და სხვები კანონის მიხედვით – ეს იყო მუსოლინის მესიჯი. დღეს მეტს მისი მხრიდან არაფერს ვხედავთ. უამრავ პრობლემაზე გვინდოდა გვესაუბრა და არ მობრძანდნენ. უკანონო და მძლავრი პასუხი იყო მერის მხრიდან, რომ მე სანამ არ გადავწყვეტ, არც მოვლენ!

თავგასულობა და კორუფცია არის იმის მიზეზი, რომ სამუშაოები არ სრულდება – როდესაც არანაირი გარე კონტროლი არ გაინტერესებს, შესისხლხორცებული ხარ რამდენიმე კომპანიასთან და სხვა კომპანიების წინადადებებს არც განიხილავ. ბოლო 2 წლის განმავლობაში კომპანია „გრინსერვის +“-სს მილიონობით ლარის სამუშაო აქვს შესრულებული. მარტო ჩვენ კი არ გვიჩნდება კითხვები, ყველას გაუჩენს კითხვებს მათი საქმიანობა. ვაკეში დამონტაჟებული ნაგვის ურნებიც, რომელმაც ბევრი კითხვა გააჩინა, ამ კომპანიის მიერ იყო შემოტანილი. ამ კომპანიის შესახებ ვიცით ის, რომ ათობით მილიონის ტენდერი აქვს მოგებული, ტენდერის გარდა, რაც ყველაზე მნიშვნელოვანია ერთ პირთან მოლაპარაკებით აქვს უამრავი თანხა გატანილი და წლების განმავლობაში მასთან ურთიერთობა კომფორტული იყო.

არაფერ შუაში არ არის აქ ტექნიკური პრობლემა ან გადაცდომა, ამ ხელისუფლების პირობებში, როგორც ახლა ქალაქის მმართველობა მიმდინარეობს, „აქედან გამოექანეთ“, „იქიდან გამოექანეთ“, ეს არის მერის ლექსიკა, რა თქმა უნდა, ის ვერ მოიცლის საქმისთვის და საქმე ვერ გაკეთდება ისე, რომ ჩვენი შვილები, ჩვენ დაცულები ვიყოთ და ქალაქი დაემსგავსოს ქალაქს“, – განაცხადა ონიანმა.