მამუკა გამყრელიძე: დიპლომატიური ხერხებით უკრაინაში ომის შეჩერება უკვე შეუძლებელია
უკრაინაში ომის ბედის გადაწყვეტა უკრაინის სასარგებლოდ არა მხოლოდ უკრაინის, მთელი დემოკრატიული სამყაროს მთავარი ამოცანაა. სავარაუდოდ, დიპლომატიური ხერხებით ომის ამ ეტაპზე შეჩერება შეუძლებელია. უკრაინამ ექვსი თვის განმავლობაში გამოიჩინა არნახული სიმამაცე და სიმტკიცე. მას აკლია თანამედროვე იარაღის ის რაოდენობა, რაც ქვეყანას გამარჯვებამდე და სრულ დეოკუპაციამდე მიიყვანს,- ამის შესახებ პარტია „ევროპელი დემოკრატების“ გენერალურმა მდივანმა მამუკა გამყრელიძემ განაცხადა.
მისივე თქმით, დიპლომატიური ხერხებით ომის ამ ეტაპზე შეჩერება შეუძლებელია.
„როგორც ცნობილი გახდა, 18 აგვისტოს ლვოვში იგეგმება თურქეთის პრეზიდენტის რეჯეფ თაიფ ერდოღანის და გაეროს გენერალური მდივნის ანტონიო გუტერეშის შეხვედრა უკრაინის პრეზიდენტთან. თურქული მედიის ინფორმაციით, რომელიც ეყრდნობა თურქეთის პრეზიდენტის ადმინისტრაციას, ერდოღანი, რომელიც ძალიან ხანმოკლე პერიოდში ორჯერ შეხვდა რუსეთის პრეზიდენტს, ზელენსკისთან უკრაინაში ომის დიპლომატიური გზებით დასრულების შესაძლებლობებს განიხილავს.
საინტერესოა, რას ემსახურება ეს შეხვედრა და ამ ეტაპზე რა დიპლომატიურ გზებზე და ხერხებზე შეიძლება იყოს საუბარი, კონფლიქტის გადასაჭრელად? არსებობს უკრაინაში ომის დასრულების სამი შესაძლო ვარიანტი: ცეცხლის შეწყვეტა, რუსეთის ჯარების დაბრუნება საკუთარ ტერიტორიაზე, მათ შორის ყირიმიდან და უკრაინის სრული დეოკუპაცია; ცეცხლის შეწყვეტა და რუსეთის ჯარების დაბრუნება 24 თებერვლამდე არსებულ ფარგლებში და მესამე ვარიანტი – ცეცხლის შეწყვეტა იმ პოზიციაში, რაშიც ახლა იმყოფებიან დაპირისპირებული მხარეები.
პირველი ორი ვარიანტი გამომდინარე კრემლის და პუტინის აგრესიული პოლიტიკიდან სრულიად მიუღებელი იქნება რუსეთისთვის, იმის გათვალისწინებით, რომ ამ ომის განმავლობაში რუსეთმა მიიღო კატასტროფული რეპუტაციული დარტყმა, უმძიმესი ეკონომიკური სანქციები, პრაქტიკულად გაანადგურა რუსეთის ეკონომიკა, საბანკო სექტორი, დაკარგა 40 ათასზე მეტი ჯარისკაცი და ა.შ. ომის დასრულების მესამე ვარიანტი ნიშნავს, უკრაინის დამარცხებას ამ ეტაპზე, რაც რა თქმა უნდა, მიუღებელია უკრაინელებისთვის, რომელთაც ამ ექვსი თვის განმავლობაში გმირულად იბრძოლეს თითოეული გოჯი მიწისთვის. დღეს ქვეყანა უმძიმეს მდგომარეობაშია, უთვალავი უდანაშაულო მსხვერპლი, დანგრეული და განადგურებული ქალაქები და ინფრასტრუქტურა. ისიც ცხადია, რომ ასეთ მდგომარეობაში მყოფ ქვეყანაში, თუ უკრაინის დიდი ნაწილი ოკუპირებული დარჩება და საომარი მოქმედებების განახლების დიდი საფრთხე იარსებებს, არავინ დაიწყებს უკრაინის ეკონომიკის აღდგენას და ინვესტიციების ჩადებას.
სავარაუდოდ, დიპლომატიური ხერხებით ომის ამ ეტაპზე შეჩერება შეუძლებელია. არ არსებობს ომის დასრულების სხვა გზა, გარდა რუსეთის სრული მარცხის და უკრაინის დეოკუპაციისა. ამისთვის საჭიროა მაქსიმალური რაოდენობის თანამედროვე იარაღის მიწოდება უკრაინისთვის, რაც მთლიანად გადაწყვიტავს ომის ბედს უკრაინის სასარგებლოდ“, – აცხადებს მამუკა გამყრელიძე.