ბრეგაძე: ირაკლი ღარიბაშვილი ყველა დროის ყველაზე წარმატებული თავდაცვის მინისტრი იყო. მან ძალიან კარგად იცის საქართველოს ისტორია – ბრალდება, თითქოს მან რაიმე განცხადება შეგნებულად გააკეთა, არის ყოვლად დაუშვებელი
დამერწმუნეთ ირაკლი ღარიბაშვილმა ძალიან კარგად იცის საქართველოს ისტორია – ის არის ერთ-ერთი ყველაზე ღირსეული ადამიანი, რომელსაც ვიცნობ და შესაბამისად, მსგავსი ტიპის ბრალდება, თითქოს მან რამე განცხადება შეგნებულად გააკეთა ან ა.შ. არის ყოვლად დაუშვებელი, – ამის შესახებ საქართველოს იუსტიციის მინისტრმა რატი ბრეგაძემ ჟურნალისტებთან განაცხადა, რითაც უპასუხა ოპოზიციისა და საზოგადოების ნაწილის კრიტიკასთან დაკავშირებით დასმულ კითხვას, რომელიც საქართველოს პრემიერ-მინისტრის, ირაკლი ღარიბაშვილის მიერ სოციალურ ქსელში გამოქვეყნებულ განცხადებას, „14 წელია ჩვენი ქვეყნის გული – სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული” , მოჰყვა.
იუსტიციის მინისტრის შეფასებით, თამამად შეიძლება ითქვას, რომ ირაკლი ღარიბაშვილი ყველა დროის ყველაზე წარმატებული თავდაცვის მინისტრი იყო.
„დამერწმუნეთ მან ძალიან კარგად იცის საქართველოს ისტორია და ძალიან ბევრი რამ გააკეთა თავდაცვის ძალებისთვის და ნებისმიერ სამხედროს შეგიძლიათ ამის შესახებ ჰკითხოთ. ის არის ერთ-ერთი ყველაზე ღირსეული ადამიანი, რომელსაც ვიცნობ და შესაბამისად, მსგავსი ტიპის ბრალდება, თითქოს მან რამე განცხადება შეგნებულად გააკეთა ან ა.შ., არის ყოვლად დაუშვებელი და კიდევ ერთხელ გეტყვით, მას ძალიან ბევრი აქვს ამ ქვეყნისთვის და კონკრეტულად, თავდაცვის ძალებისთვის გაკეთებული და მათ შორის, ჩვენი გმირების ხსოვნის უკვდავყოფისთვის“, – განაცხადა რატი ბრეგაძემ.
შეგახსენებთ, საქართველოს პრემიერ-მინისტრმა ირაკლი ღარიბაშვილმა სოციალურ ქსელში 2008 წლის რუსეთ-საქართველოს ომთან დაკავშირებით განცხადება გამოაქვეყნა, რომელშიც ღარიბაშვილი აღნიშნავს: „14 წელი გავიდა 2008 წლის აგვისტოს ომის დაწყებიდან, რომელმაც ბევრი ჩვენი თანამოქალაქის სიცოცხლე შეიწირა. 14 წელია ჩვენი ქვეყნის გული – სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული”.