ირაკლი ქადაგიშვილი: არავის არ მოსწონს, როდესაც ადამიანი აღელვებულია და აგრესიას გამოხატავს, მაგრამ …
არავინ არ ვართ დაზღვეული, რომ მძიმე შეურაცხყოფებზე, რომელიც პერმანენტული ხასიათის არის, არ გავცეთ პასუხი ისე, რასაც ეს აღვირახსნილი შემოტევა გულისხმობს ხოლმე. თმენის ვალდებულება გახდა უნიკალური ვალდებულება იმისა, რომ შეურაცხყოფა უნდა დაკანონდეს საქართველოში, – ასე აფასებს საპარლამენტო უმრავლესობის წევრი, ირაკლი ქადაგიშვილი „ქართული ოცნების“ თავმჯდომარე ირაკლი კობახიძესა და ტელეკომპანია „მთავარის“ ჟურნალისტს შორის მომხდარ ინციდენტს.
როგორც მან „პალიტრანიუსის” გადაცემაში “პოლიტიკური სივრცე“ აღნიშნა, გვჭირდება ისეთი ნაბიჯების გადადგმა, რომელიც მედიას დაუბრუნებს თავის შინაარსს და თავად როგორც რიგითი დეპუტატი, ამ საკითხს დასვამს.
„ბუნებრივია, არავის არ მოსწონს, როდესაც ადამიანი აღელვებულია და აგრესიას გამოხატავს, მაგრამ აქ ცოტა ღრმად უნდა ჩავიხედოთ – რა იწვევს ადამიანში ამ მდგომარეობის გამოწვევას. არავინ არ ვართ დაზღვეული, რომ მძიმე შეურაცხყოფებზე, რომელიც პერმანენტული ხასიათის არის არ გავცეთ პასუხი ისე, რასაც ეს აღვირახსნილი შემოტევა გულისხმობს ხოლმე. თმენის ვალდებულება გახდა უნიკალური ვალდებულება იმისა, რომ შეურაცხყოფა უნდა დაკანონდეს საქართველოში. თუ გოგონაზე და ქალბატონზეა საუბარი, მაშინ მანაც უნდა იცოდეს როგორ ისაუბროს. არ ვიცი თავად როგორ ვუპასუხებდი, იმიტომ რომ მრავალი შემთხვევა გვაქვს ასეთი, ეს არის ადეკვატური რეაგირება ადამიანის ფსიქიკის მხრიდან. მე რომ პოლიტიკოსი ვარ და თმენის ვალდებულება გამაჩნია, ეს არ არის უსაზღვრო რამ, დამისახელეთ ევროპაში და ამერიკაში ჟურნალისტი თუ გადადის ზღვარს თავისი პროფესიული მოვალეობის დროს, რომ რომელიმე პოლიტიკოსი ვალდებულია თმენის ვალდებულება გამოიყენოს. გვჭირდება ისეთი ნაბიჯების გადადგმა, რომელიც მედიას დაუბრუნებს თავის შინაარსს და მედიის სახეს. არის მთელი რიგი რეკომენდაციები, რომელსაც ევროკავშირი ითხოვს, რომ გატარდეს ამ მიმართულებით, მე როგორც ერთი დეპუტატი დავსვამ საკითხს ამასთან დაკავშირებით“, – აღნიშნა ირაკლი ქადაგიშვილმა.
რაც შეეხება ქვეყანაში პოლარიზაციის საკითხს, მის დასრულებას და ამ კუთხით ოპოზიციასთან მუშაობის აუცილებლობას, ქადაგიშვილის თქმით, რეკომენდაციებზე მუშაობა მხოლოდ პარლამენტში არის შესაძლებელი, ოპოზიცია კი აცხადებს, რომ ამ პროცესში არ ჩაერთვება.
,,აღმოჩნდა, რომ ევროკავშირის რეკომენდაციების ვერ შესრულებაზე „ქართული ოცნებაა“ დამნაშავე, არსებობს 12 რეკომენდაცია, რომელიც პარლამენტში უნდა შესრულდეს, სხვაგან ვერსად ვერ შესრულდება, იქნება ეს „ენჯეო“-ებში თუ მიტინგზე. რადიკალური ოპოზიცია ამბობს, რომ ამ პროცესში არ ჩავერთვებიო, პროცესში ჩართვა ნიშნავს თანამონაწილეობას. რატომ უნდა ვიმუშავოთ მათთან როდესაც დღე და ღამ რევოლუცია როგორ მოაწყონ ამაზე არიან ორიენტირებული. მაინც ვეპატიჟებით და ვთხოვთ, წავედით მიშელის ხელშეკრულებაზე, რომელსაც არ შემოუერთდნენ. ასეთი სიბრიყვე პოლიტიკაში დაუშვებელია, არ შეიძლება ასეთი მავნე კატეგორიებით სახელმწიფო ვაშენოთ“, – აღნიშნა ირაკლი ქადაგიშვილმა.