სერგო ჩიხლაძე: თავდასხმები საერთაშორისო პარტნიორებზე „ქართული ოცნების“ მხრიდან კიდევ უფრო გაძლიერდება, რათა …

„ქართული ოცნებისთვის“ რეალური ტესტი და პოლიტიკური ნების გამოვლენა პარლამენტის რიგგარეშე სესიის დანიშვნა იქნება და სესიაზე ისეთი საკითხების განხილვა, დაყენება და მიღება, როგორიცაა მაგალითად, საკონსტიტუციო ცვლილებები, – ამის შესახებ „სტრატეგია აღმაშენებლის“ ერთ-ერთმა ლიდერმა სერგო ჩიხლაძემ ჟურნალისტებთან ხელისუფლებასთან თანამშრომლობის პერსპექტივაზე საუბრისას განაცხადა.

მისივე თქმით, ხელისუფლებასთან კონსულტაციები და ისეთ ადამიანებთან შეხვედრა, რომლებიც გადაწყვეტილებას ვერ იღებენ, საკუთარი თავის მოტყუება და საზოგადოების შეცდომაში შეყვანაა.

„კონსულტაციები არის უსაგნო. ვნახეთ პირველი კონსულტაცია ბატონ [შალვა] პაპუაშვილთან, რომელიც კომიკური შედეგით დასრულდა. ისეთ ადამიანებთან შეხვედრა, რომლებიც გადაწყვეტილებას ვერ იღებენ და საკუთარი გუნდის შიგნით წონა არ აქვთ, არის საკუთარი თავის მოტყუება და საზოგადოების შეცდომაში შეყვანა, თითქოს რაღაც პროცესები მიმდინარეობს“, – აღნიშნა სერგო ჩიხლაძემ.

მისივე ვარაუდით, მმართველი გუნდის მხრიდან საერთაშორისო პარტნიორებზე ზეწოლა გაძლიერდება, რომ „მაქსიმალურად დავშორდეთ დასავლეთს და კანდიდატის სტატუსთან დაკავშირებით ნეგატიური პასუხი მივიღოთ“.

„სამწუხაროდ, გვაქვს მოლოდინი, რომ თავდასხმები ჩვენს საერთაშორისო პარტნიორებზე „ქართული ოცნების“ მხრიდან, კიდევ უფრო გაძლიერდება, როგორც ვნახეთ ივნისამდე, რომ მაქსიმალურად დავშორდეთ დასავლეთს და ნეგატიური პასუხი იყოს სტატუსთან დაკავშირებით. ამისკენ არიან მოწოდებულები და სამწუხაროდ, ეს პროცესი გაძლიერდება“, – აღნიშნა სერგო ჩიხლაძემ.