როგორც კი აქცია მიიღებს კანონთან შეუსაბამო ფორმას, იქნება პროპორციული სამართლებრივი რეაგირება
”შინ ევროპისკენ” – სამოქალაქო მოძრაობა “სირცხვილიას” დაანონსებულ მორიგ აქციას, რომელიც დღეს პარლამენტთან უნდა გაიმართოს, უმრავლესობა დესტაბილიზაციის მცდელობად აფასებს.
“ქართული ოცნების” წევრების განცხადებით, კიდევ ერთხელ დადასტურდა, რომ აქციის ორგანიზატორების მიზანი არა ევროპული გზა, არამედ არეულობა და ხელისუფლების ძალადობრივი გზით ხელში ჩაგდებაა.
მათი განცხადებით, აქციის მონაწილეების უფლებაა გამოსვლა და პროტესტი, თუმცა კანონდარღვევის შემთხვევაში, შესაბამისი სამართლებრივი ზომები იქნება მიღებული.
“არ გამოვა საუბარი იმაზე, რომ ერთის მხრივ ვითანამშრომლოთ მათთან, მეორე მხრივ კი გვიწყობდნენ რევოლუციური სცენარებს და საუბრობდნენ ჩვენს დამთავრებაზე. არავინ მისცა მათ უფლება, რომ ამ ტონით გვესაუბრონ ამომრჩევლებს ან ჩვენ. ამიტომ მშვიდობიანი შეკრება სურთ – შეიკრიბონ, სურთ კრიტიკის გამოთქმა – გამოთქვან. როგორც კი ეს მიიღებს კანონთან შეუსაბამო ფორმას, იქ იქნება ადეკვატური და პროპორციული სამართლებრივი რეაგირება”, – აცხადებს “ქართული ოცნების” წევრი ანრი ოხანაშვილი.
უმრავლესობის დეპუტატი დავით მათიკაშვილი მიიჩნევს, რომ მიმდინარე პროცესებმა ფარდა ახადა ნაციონალური მოძრაობის და სირცხვილიას რეალურ გეგმებს.
“ეს ყველაფერი ძალიან კარგად კიდევ ერთხელ ფარდას ხდის “ნაციონალურ მოძრაობას”, “სირცხვილიას” და სხვა ასეთი დესტრუქციული ძალების რეალურ გეგმებს, რომ მათ არა საქართველოს ევროპული პერსპექტივა და განვითარება, არამედ მხოლოდ საკუთარი პარტიული ამბიციები და დესტრუქცია აინტერესებთ და სურთ, რომ ქვეყანა კვლავ ქაოსში და ძალადობაში მოაქციონ”, – განაცხადა დავით მათიკაშვილმა