რუსეთმა უჩვეულო საბრძოლო ჯავშანმანქანები განათავსა უკრაინაში, დონბასის რეგიონში
ახალი ფოტოები ადასტურებს, რომ რუსეთმა უჩვეულო საბრძოლო ჯავშანმანქანები განათავსა უკრაინაში, დონბასის რეგიონში.
ეს ტანკების დამხმარე საბრძოლო მანქანა (БМПТ), რომელიც რუსეთში იწარმოება, სწავლების დროსაა გადაღებული, 2017 წელს.
მწარმოებლის, „ურალვაგონზავოდის“, მიერ „ტერმინატორად“ წოდებული ეს მანქანები მედიის ყურადღებას იპყრობს მას მერე, რაც ისინი უკრაინაში შენიშნეს.
ფოტო ზემოთ და კიდევ ორი ვიდეოჩანაწერი, რომლებიც მოყვარულებმა გადაიღეს, აჩვენებს „ტერმინატორების“ ყოფნას უკრაინის აღმოსავლეთში, სევეროდონეცკის რაიონში. ამ საბრძოლო მანქანების უკრაინაში გადასროლა 18 მაისს დაადასტურა რუსეთის საინფორმაციო სააგენტომ „რია ნოვოსტიმ“.
„ტერმინატორი“ რუსეთის მცდელობის შედეგია, შეექმნა ისეთი მანქანა, რომლის დანიშნულება იქნებოდა საომარი მოქმედების წარმოება ვიწრო საქალაქო პირობებში.
ეს აუცილებლობა გაჩნდა ჩეჩნეთის ომის შემდეგ, როცა ჩეჩენმა მეამბოხეებმა გაანადგურეს რუსეთის ჯავშანტექნიკის დიდი რაოდენობა.
ჩეჩნეთის დედაქალაქისთვის ბრძოლებისას, 1994-1995 წლებში, ადგილობრივ მეამბოხეებს შეეძლოთ შენობების ფანჯრებიდან და კარებიდან იაფიანი ტანკსაწინააღმდეგო ნაღმმტყორცნებით ესროლათ და შემდეგ მიმალულიყვნენ მათთვის ნაცნობ ტერიტორიაზე.
რუსული ტანკების საცეცხლე ეფექტიანობა ნულამდე დავიდა, რადგან მათ არ შეეძლოთ მკვეთრად მაღლა სროლა, ან ლულის ისე დახრა, რომ სარდაფებში ჩასაფრებული ჩეჩენი მებრძოლები მწყობრიდან გამოეყვანათ.