გიორგი გუდაბანძე: ისტორიიდან ვისწავლოთ რაღაცეები, ამისთვის გვაქვს 2006 წლის ეკონომიკური ემბარგო, რომელიც რუსეთმა დაგვიწესა და კოლაფსამდე მიიყვანა ჩვენი საგარეო ვაჭრობა
„მნიშვნელოვანია, რომ ჩვენ ისტორიიდან ვისწავლოთ რაღაცეები, ამისთვის გვაქვს 2006 წლის ეკონომიკური ემბარგო, რომელიც რუსეთმა დაგვიწესა და ვიცით, რა კოლაფსამდე მიიყვანა ჩვენი საგარეო ვაჭრობა“ – ამის შესახებ ექსპორტის განვითარების ასოციაციის ექსპერტმა გიორგი გუდაბანძემ „ბიზნესპრესნიუსთან“ საუბრისას განაცხადა.
მისი თქმით, რუსეთს სამხედრო აგრესიამ, რომელსაც ის უკრაინაში ახორციელებს, კიდევ ერთხელ დაგვანახა, რომ რუსული ბაზრის სასწრაფოდ ჩანაცვლება უნდა მოხდეს.
ამისთვის კი, რამდენიმე პუნქტთან ერთად, აუცილებელია, „არცერთი კაპიკი არ დახარჯოს არც სახელმწიფომ, არც რომელიმე ორგანიზაციამ, რომ რუსული ბაზრის ათვისებაში ხელი შეუწყოს კომპანიებს“.
ცნობისთვის, სტატისტიკის ეროვნული სამსახურის მონაცემებით, საქართველოს საგარეო ვაჭრობაში, ერთ-ერთი მთავარი სავაჭრო პარტნიორი თებერვალშიც რუსეთი იყო.
„პირდაპირ ვიტყვი, რომ ამ მიმართულებით, ძალიან ცუდი ვითარება გვაქვს. როგორც სტატისტიკიდან ჩანს, საქართველო ჯერ კიდევ ძალიან ძლიერად არის დამოკიდებული რუსულ ბაზარზე.
ჩვენი ასოციაცია, სხვადასხვა ფორმატში, შეხვედრებზე, ტრენინგებზე, კონფრენეციებსა თუ მედიასთან შეხვედრებზე, ყოველთვის საუბრობდა ბაზრების დივერსიფიცირების მნიშვნელობაზე, ასევე, თუ რატომ არ უნდა ვიყოთ დამოკიდებული ისეთ არასტაბილურ და არამეგობარ ქვეყანასთან, როგორიც არის რუსეთი. თუმცა, ამან მაინც არ მოგვცა ის შედეგი, რასაც ყველა ვისურვებდით, რომ ყოფილიყო ჩვენი საგარეო ვაჭრობის კუთხით. მოგეხსენებათ, მთელი მსოფლიოს მხრიდან იზოლაციაში ექცევა რუსეთი და მისი ეკონომიკა. შესაბამისად, ეჭვგარეშეა, რომ აღნიშნული იზოლაცია და სანქციები, რომელიც სხვადასხვა ქვეყნებმა დაუწესეს რუსეთს, ჩვენზეც ასევე ცუდ გავლენას მოახდენს, როგორც იმპორტის, ისე ექსპორტის კუთხით. იმპორტის კუთხითაც ჩვენ ძალიან დიდად ვართ დამოკიდებული რუსეთიდან შემოსულ სხვადასხვა სამომხმარებლო პროდუქტზე. რა თქმა უნდა, ეს თავისთავად გამოიწვევს ფასების ზრდას, გარკვეული მიმართულებით პროდუქტის დეფიციტს. მით უმეტეს, რომ წინასწარ პროგნოზების გაკეთება, არც თუ ისე მარტივია, რადგან ჩვენ უბრალოდ არ ვიცით, როგორ დამთავრდება რუსული აგრესია უკრაინის მიმართ.
ვისურვებდით, რომ მალე დასრულდეს, და რა თქმა უნდა, უკრაინის სასარგებლოდ, თუმცა ახლა რთულია იმ ზარალის მასშტაბებსა და უარყოფით გავლენებზე საუბარი, რომელიც ჩვენ ქვეყანას ელის, იმ საომარი მოქმედებების გამო, რომელიც რუსეთმა დაიწყო უკრაინის მიმართ“,- ამბობს გიორგი გუდაბანძე.
რაც შეეხება გამოსავალს, როგორც ექსპერტი განმარტავს, ახალი ბაზრების ათვისებას რამდენიმე წინაპირობა აქვს, რომელიც რაც შეიძლება სწრაფი ტემპი უნდა განხორციელდეს, რათა რუსეთ-უკრაინის ომით, საქართველოს ეკონომიკისთვის მიყენებული ზარალი შეძლებისდაგვარად შემცირდეს.
„მნიშვნელოვანია, რომ ისტორიიდან ვისწავლოთ რაღაცეები, ამისთვის გვაქვს 2006 წლის ეკონომიკური ემბარგო, რომლიც რუსეთმა დაუწესა საქართველოს და ვიცით, ამან რა კოლაფსამდე მიიყვანა ჩვენი საგარეო ვაჭრობა. ჩვენ მაშინაც ასე მძლავრად ვიყავით დამოკიდებული რუსეთის ბაზარზე. შემდგომ უკვე ძალიან კარგი ძვრები იყო ჩვენი საგარეო ვაჭრობის მიმართულებით, რადგან ჩვენს ექსპორტიორებს და იმპორტიორებს, მოუწიათ ალტერნატიული ბაზრების მოძიება და საკმაოდ პოზიტიურად მიმდინარეობდა ეს პროცესი. თუმცა, რუსეთის ბაზარზე დაბრუნებამ, 2013 წლიდან, ისევ გამოკვეთა ურყოფითი სურათი და დღეს უკვე გვაქვს ის რეალობა, რომელსაც თვალი უნდა გავუსწოროთ.
ამ ვითარებაში, სასწრაფოდ უნდა დაიწყოს მუშაობა ახალი ბაზრების მოძიებაზე და კონკრეტული ნაბიჯები გადავდგათ. პირველ რიგში, სახელმწიფო პროგრამებით, რომლის ფარგლებშიც არაერთი ღონისძიება იმართება საზღვრებს გარეთ, ჩვენ ექსპორტიორ კომპანიებს უნდა მიეცეთ მეტი შესაძლებლობა, რომ მოიძიონ ახალი პარტნიორები. თუმცა, აქ უნდა გამოირიცხოს რუსული ბაზარი. არცერთი კაპიკი არ უნდა დახარჯოს სახელმწიფომ, არც რომელიმე ორგანიზაციამ, რომ რუსული ბაზრის ათვისებაში ხელი შეუწყოს კომპანიებს. პირიქით, ჩვენი მიზანია, რომ განვითარებულ, სტაბილურ, ნდობით აღჭურვილ ბაზრებზე მოხდეს შესვლა და თავის დამკვიდრება. ისეთებზე როგორიცაა, ევროკავშირი, აშშ, გალფის რეგიონი. ანუ განვითარებული მსოფლიო, რომელიც რუსეთისგან დამოუკიდებლად არის, ამით ჩვენც გვექნება შესაძლებლობა, რომ რუსეთის გარეთ გავყიდოთ პროდუქტი.
ვრცლად იხილეთ აქ