“ვერ გავიგე, კობახიძე რის აკრძალვას აპირებს”

ირაკლი კობახიძეს ყოველთვის თავი მოაქვს მაღალი კლასის იურიდიული განათლებით. ალბათ, მის ნებისმიერ ყოფილ პროფესორს თმები ყალყზე დაუდგება, როგორ იურიდიულ ნონსენსს აცხადებს მათი ყოფილი სტუდენტი, – ამის შესახებ “ნაციონალურმა მოძრაობის” ერთ-ერთმა ლიდერმა სალომე სამადაშვილმა “პალიტრანიუსის” გადაცემა “360 გრადუსში” განაცხადა, რითაც გამოეხმაურა “ქართული ოცნების” აღმასრულებელი მდივნის ირაკლი კობახიძის განცხადებას, რომ მიხეილ სააკაშვილი არ აკმაყოფილებს 2 კონსტიტუციურ საარჩევნო ცენზს.

“ეს უბრალოდ, სასაცილოა, რადგან ვერ გავიგე, კობახიძე რის აკრძალვას აპირებს. მაგალითად, იმის, რომ ადამიანმა ინტერნეტ სივრცეში სხვა ადამიანებს მიმართოს? თუ როგორ აპირებს, რომ შეზღუდოს კომუნიკაციის სივრცე?! მიხეილ სააკაშვილს არანაირი თანამდებობა არ უჭირავს, მაგრამ ხშირად ესაუბრება ადამიანებს. კობახიძისგან განსხვავებით, ასობით ათას ადამიანს აინტერესებს, რა აქვს სათქმელი მიხეილ სააკაშვილს. აბსურდული განაცხადია, სასოწარკვეთაშია ბატონი კობახიძე და უკვე ენით აღუწერელ სისულელეებს აკეთებს. როდესაც ირაკლი კობახიძე “ნაციონალურ მოძრაობაზე” და მიხეილ სააკაშვილზე ასე საუბრობს, ავიწყდება ერთი მარტივი რამ, რომ “ნაციონალურ მოძრაობა” არც მიხეილ სააკაშვილია და არც რომელიმე ლიდერი. „ნაციონალური მოძრაობა“ ასობით ათასი ადამიანია, რომელიც ამ პარტიას წლების მანძილზე მხარს უჭერს. კობახიძე საკუთარ თანამოქალაქეებს შეურაცხყოფას აყენებს, ეუბნება, რომ დაჩაგრავს, აუკრძალავს, რომ საერთოდ პოლიტიკური არჩევანი ჰქონდეთ. ეს თუ არის იმ პოლიტიკური ძალის წარმომადგენლის გამოსვლა, რომელსაც რაღაც დიალოგისკენ აქვს მოწოდება, მგონი, ყველა ვხვდებით რა გზასაც უნდა, რომ დაადგეს ბატონი კობახიძე. კობახიძე, როგორც ჩანს აჟღერებს “ქართული ოცნების” პოზიციებს, რაც მიმართულია იმისკენ, რომ “ქართული ოცნება” ხელისუფლებას აუცილებლად დატოვებს. კობახიძის სცენარით “ქართული ოცნება” უბრალოდ კი არ დატოვებს ძალაუფლებას და ოპოზიციაში გადავა, როგორც “ნაციონალური მოძრაობა” წავიდა თავის დროზე ოპოზიციაში – არა, ბიძინა ივანიშვილი და “ქართული ოცნება” პოლიტიკურ მოღვაწეობას აუცილებლად დაასრულებს ისე, როგორც დაასრულა ასლან აბაშიძემ და მისმა პოლიტიკურმა გაერთიანებამ”, – განაცხადა სალომე სამადაშვილმა.

ცნობისთვის, “ქართული ოცნების” აღმასრულებელმა მდივანმა ირაკლი კობახიძემ განაცხადა, რომ მიხეილ სააკაშვილი არ აკმაყოფილებს ერთდროულად ორ კონსტიტუციურ საარჩევნო ცენზს და ახალი მოწვევის პარლამენტში “ქართული ოცნება” დააინიცირებს კანონპროექტს, რომლის საფუძველზეც საარჩევნო რეგისტრაცია გაუუქმდება იმ პოლიტიკურ პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს.