არსებობს საკვანძო და რთული საკითხები, რომელზეც პოზიციების დაახლოება ჯერჯერობით ვერ ხერხდება
ოპოზიცია აცხადებს, რომ “ქართული ოცნება” საკვანძო საკითხებზე კომპრომისზე უნდა წავიდეს, თუ ეს არ მოხდება, მათი თქმით, მოლაპარაკების პროცესი წარმატებულად ვერ დასრულდება.
“პროცესი მიმდინარეობს ძალიან რთულად, იმიტომ რომ არსებობს საკვანძო და ძალიან რთული საკითხები, რომელზეც პოზიციების დაახლოება ჯერჯერობით ვერ ხერხდება. ამის გარეშე მოლაპარაკებების წარმატება შეუძლებელია, თუმცა ოპოზიცია მზად არის გააგრძელოს მოლაპარაკებები, მაგრამ ხელისუფლება თუ არ გადახედავს საკუთარ პოზიციებს იმ მთავარ საკითხებზე რაც შეეხება ვადამდელი არჩევნების ჩანიშვნას და პოლიტპატიმრების თემას, სამწუხაროდ ვერანაირ სხვა საკითხებზე შეთანხმება ვერ გამოიწვევს იმას, რომ ეს მოლაპარაკების პროცესი დასრულდეს წარმატებით,” – განაცხადა “ნაციონალური მოძრაობის” წევრმა სალომე სამადაშვილმა.
“როგორც კი შედგება “ერთპარტიული” პარლამენტი, რა თქმა უნდა, ზეწოლა, როგორც საზოგადოებრივი, ასევე საერთაშორისო პარტნიორების მხრიდან ზეწოლა “ქართულ ოცნებაზე” ერთი-ორად გაიზრდება და მათ მაინც მოუწევთ კომპრომისზე წამოსვლა და საუბარი რიგგარეშე არჩევნების საკითხზე,” – განაცხადა “ევროპული საქართველოს” წევრმა გიორგი კანდელაკმა.
პარტია “სტრატეგია აღმაშენებელის” პოლიტიკური საბჭოს წევრის სერგო ჩიხლაძის თქმით, სანამ ოპოზიციის მოთხოვნები სრულად არ იქნება გათვალისწინებული, მანამდე პარლამენტში შესვლაზე საუბარი არ განიხილება. ჩიხლაძის თქმით, მათ იმედი აქვთ, რომ “ქართული ოცნება” აცნობიერებს ჩიხიდან გამოსვლის მნიშვნელობას და შეთანხმება მოხდება.
48 საათში მე-10 მოწვევის პარლამენტი შეიკრიბება – თუმცა უცნობია მრავალპარტიულად, თუ ისე, როგორც ქართული პარლამენტარიზმის ისტორიას არ ახსოვს. ეს დამოკიდებული იყო და არის, ფასილიტატორი ელჩების მონაწილეობით დაგეგმილ შეხვედრებზე, რომელიც უკვე ოთხ შემთხვევაში კონკრეტული შედეგის გარეშე დასრულდა.
შეთანხმება მიღწეულია, რომ დიალოგი გაგრძელდება, მაგრამ არავინ იცის რა პერსპექტივა აქვს მას. გასაიდუმლოებულია ის, რაზეც დახურულ კარს მიღმა მსჯელობენ. უცვლელი პოზიციებით სავარაუდოა, რომ მხარეები მოლაპარაკების მაგიდას დღესაც მიუსხდებიან. გასარკვევია საბოლოო შედეგამდე შეცვლის თუ არა ოპოზიცია გეგმებს და ძალაში დარჩება დღის წესრიგი, რომელიც მანდატებზე დემონსტრაციულად უარის თქმას ითვალისწინებს.