Boxing Day-ի առեղծվածը․ փաստեր եւ միֆեր
Երբ ամեն տարվա դեկտեմբերի վերջին բոլորը պատրաստվում են սուրբծննդյան տոներին, երկրպագուներին ուրախացնող միակ ֆուտբոլային առաջնությունն Անգլիայի Պրեմիեր լիգան է: Կաթոլիկների Սուրբ Ծնունդի հենց հաջորդ օրը ֆուտբոլային հանդիպումներ անցկացնելու ավանդույթն արդեն ձգվում է տասնյակ տարիներ:
Ինչ է Boxing Day-ը
Շատ ֆուտբոլասերներ կարծում են, որ Boxing Day-ը գրեթե 10 օր տեւող ժամանակահատված է, երբ անցկացվում են Պրեմիեր Լիգայի բազմաթիվ ֆուտբոլային հանդիպումներ: Բայց դա բոլորովին էլ այդպես չէ: Իրականում Boxing Day-ը միայն մեկ օր է՝ դեկտեմբերի 26-ը: Սուրբ Ծնունդին հաջորդող օրը յուրաքանչյուր անգլիական ընտանիքում ընդունված է միմյանց նվերներ բաժանել հենց առավոտից, իսկ կեսօրից սկսած ընկղմվել ֆուտբոլային հրաշք մթնոլորտի մեջ:
Boxing Day-ի խաղերը յուրօրինակ են եւ տարբերվող: Անգլիան միակ երկիրն է, որտեղ հենց Սուրբ Ծնունդի հաջորդ օրը երկրպագուները հնարավորություն են ստանում հետեւելու իրենց սիրելի թիմի ելույթներին:
Boxing Day-ի պատմությունը
Ընդհանրապես, Boxing Day-ը ֆուտբոլի հետ այնքան էլ կապ չունի: Այդ օրը արիստոկրատների սպասավորները ազատվում էին աշխատանքից եւ այն անցկացնում ընտանիքի հետ: Շատերն այդ օրը հնարավորություն էին ունենում առաջին անգամ ներկա գտնվելու ֆուտբոլային խաղի կամ մարզադաշտ տանելու իրենց երեխաներին:
[[gallery1]]
Փորփրելով պատմությունը՝ պարզ է դառնում, որ առաջին ֆուտբոլային հանդիպումը հենց Սուրբ Ծնունդի հաջորդ օրը կայացել է 1860 թ-ի դեկտեմբերի 26-ին: Այդ օրը միմյանց հետ մրցել են «Շեֆիլդն» ու «Հալամը»: Այդ խաղում հաղթանակ են տարել դաշտի տերերը: Դա Boxing Day-ի առաջին խաղն էր: Իսկ արդեն գրեթե 100 տարի անց՝ 1957 թվականից Boxing Day-ի խաղերը սկսեցին կրկնվող բնույթ կրել՝ այդպիսով ավանդույթ դառնալով անգլիական բոլոր 4 դիվիզիոնների համար: Շատ մեծ ուշադրություն են դարձնում նաեւ այդ ժամանակահատվածում այն խաղերին, որոնք կրում են դերբիի կարգավիճակ: Այսինքն, խաղ, որտեղ երկու կողմերն էլ ներկայացնում են միեւնույն քաղաքը կամ շրջանը:
Boxing Day-ի խաղերի մեջ դերբիների առկայությունը թեթեւացնում է երկրպագուների հոգսերը, քանի որ վերջիններս ստիպված չեն լինում իրենց սիրելի թիմին աջակցելու համար շրջել ամբողջ երկրով` առավել եւս, որ տարվա այդ հատվածում տրանսպորտային մի շարք ծառայություններ անհասանելի են լինում:
Փաստեր
* Պրեմիեր Լիգայի վերջին 5 մրցաշրջաններում այն թիմը, որը մինչեւ Boxing Day-ը զբաղեցնում էր մրցաշարային աղյուսակի առաջին հորիզոնականը, անպայման դառնում էր չեմպիոն: Իսկ վերջին 114 տարիների ընթացքում այդպիսի դեպք գրանցվել է 52 անգամ:
* Վերջին 21 տարիների ընթացքում մինչ Boxing Day-ը վերջին հորիզոնականում ընթացող թիմը մրցաշրջանի ավարտից հետո կորցնում էր տեղն անգլիական ֆուտբոլային էլիտայում` նահանջելով Չեմպիոնշիպ: Բացառություն են միայն «Վեստ Բրոմվիչը»` 2005 թվականին եւ «Լեսթերը»` 2014 թվականին:
* Ամենագոլառատ դեկտեմբերի 26-ը գրանցվել է 1963 թվականին: Ընդհանուր առմամբ 66 գոլ՝ 10 խաղում: Խելահեղ արդյունք, որը բնորոշ է միայն անգլիական ֆուտբոլին:
* Վերջին տասնամյակում 4 դեպք է գրանցվել, երբ մեկ թիմ այդ 10 օրվա ընթացքում կայացած խաղերում հավաքել է առավելագույն քանակի միավորներ: Երկու անգամ նման հաջողության հասել են «Մանչեսթեր Յունայթեդի» (2003 ու 2004 թվականներին), եւ «Չելսիի» (2004 ու 2005 թվականներին) ֆուտբոլիստները: Ընդ որում, 2004 թվականին «արիստոկրատները» կարողացել են այդ խաղերի ընթացքում իրենց դարպասն անառիկ պահել:
Boxing Day-ի ռմբարկուները
[[gallery2]]
Պրեմիեր լիգայի պատմության մեջ Boxing Day-ի լավագույն ռմբարկուն «Լիվերպուլի» լեգենդ Ռոբի Ֆաուլերն է, ով դարձել է ընդհանուր առմամբ 9 գոլի հեղինակ: Գործող ֆուտբոլիստներից՝ Ջերմեյն Դեֆոն խփել է 6, իսկ Ուեյն Ռունին եւ Գարեթ Բարին՝ 4-ական գոլ:
Boxing Day-ին ընդառաջ
Ֆուտբոլային առումով Boxing Day ասվածն իրենից ներկայացնում է 10 օրյա ժամանակահատված՝ դեկտեմբերի 26-ից մինչեւ հունվարի 4-ը ներառյալ, որի ընթացքում կայանում է Պրեմիեր լիգայի 3 տուր:
Անկասկած, հայ երկրպագուներին առաջին հերթին հետաքրքրում է Հենրիխ Մխիթարյանի թիմի՝ «Մանչեսթեր Յունայթեդի» խաղացանկը:
26.12.16 «Մանչեսթեր Յունայթեդ» - «Սանդերլենդ»
31.12.16 «Մանչեսթեր Յունայթեդ» - «Միդլսբրո»
02.01.17 «Վեսթ Հեմ» - «Մանչեսթեր Յունայթեդ»
Հենրիխ Մխիթարյանը լիովին ապաքինվել է վնասվածքից եւ կկարողանա խաղադաշտ դուրս գալ առաջիկա հանդիպումներում:
[[gallery3]]
Եթե «Սանդերլենդի» դեմ խաղը կարելի է անցողիկ համարել, ապա նույնը չէի ասի մնացած երկու դեպքերում: «Վեսթ Հեմը» վերջին շրջանում սկսել է կայուն խաղ ցուցադրել: Լոնդոնյան թիմը ձախողեց մրցաշրջանի առաջին հատվածն ու հիմա կփորձի անել առավելագույնը, որպեսզի ետ բերի կորցրածը: Ակումբի ղեկավարությունը հրապարակավ աջակցել է թիմի գլխավոր մարզիչ Սլավեն Բիլիչին՝ նշելով, որ խորվաթ մասնագետին հնարավորություն է տրվում շտկելու իրավիճակը:
Որքան էլ պարադոքսալ թվա, բայց «Միդլսբրոյի» դեմ խաղը լինելու է ամենադժվարը «Մանչեսթեր Յունայթեդի» համար: Բանն այն է, որ «Միդլսբրոյի» գլխավոր մարզիչ Այտոր Կարանկան 2010-2013թթ. աշխատել է Մադրիդի «Ռեալում»՝ որպես Ժոզե Մոուրինյոյի օգնական: Ընդհանրապես, Կարանկան միշտ հիացմունքով է արտահայտվել պորտուգալացի մասնագետի հասցեին: Մի հետաքրքիր փաստ եւս, որը, կարծում եմ, լավագույնս կբնութագրի Կարանկայի հարգանքը դեպի Մոուրինյոն։
Այտոր Կարանկայի աշխատանքային սենյակում լրագրողները նկատել են օրացույց՝ Ժոզե Մոուրինյոյի նկարով: Բացի այդ, նրանց շփումը միշտ պահպանվել է: Եվ, ինչպես ասում է հայտնի ասացվածքը՝ եթե աշակերտը գերազանցում է ուսուցչին, ապա վերջինս լավ մասնագետ է:
Եվ վերջում՝ հուսանք, որ Մխիթարյանը արդյունավետությամբ կփայլի Boxing Day-ի խաղերում:
Միհրան Ալեքսանյան