«Հայաստանի աչքերը` հրեայի աչքերով»
Fresco International Film Festival փառատոնի շրջանակներում Հայաստանի նկարիչների միությունում բացվել է հրեա լուսանկարիչ Դմիտրի Բրիքմանի աշխատանքների ցուցահանդեսը:
«Հայաստանի աչքերը հրեայի աչքերով» ցուցահանդեսին ներկայացված են լուսանկարչի 38 աշխատանքները: Լուսանկարներն արվել են Բրիքմանի՝ անցյալ տարի Հայաստան կատարած այցի ընթացքում:
«Չեք հավատա, բայց լուսանկարները չորս օրում են իրականացվել: Արդյունքում մոտ հարյուր նկար ստացվեց, որոնցից էլ մեծ դժվարությամբ ընտրեցի այսքանը», - Մեդիամաքսի հետ զրույցում նշել է հեղինակը:
Դմիտրի Բրիքմանը նախապես նպատակ չի ունեցել Հայաստանին նվիրված լուսանկարների շարք իրականացնել: Նա հիշում է, որ իր այցը Երեւան համընկավ #ElectricYerevan-ի հետ: «Ինձ Բաղրամյան պողոտա տարան ու ես այնտեղ հազարավոր աչքեր տեսա: Հրաշալի մարդիկ ու տպավորիչ աչքեր՝ մնացի ու սկսեցի լուսանկարել: Հենց այդտեղ էլ սկսվեց լուսանկարներ շարքը», - հիշում է Բրիքմանը:
[[gallery1]]
Արդեն Իսրայելում լուսանկարիչը հասկացել է, որ լուսանկարները կարելի է առանձին նախագծի տեսքով ներկայացնել՝ «Ընկերներս ասում էին, Բրիքման, քեզ կորցրեցինք, դու խեղդվել ես հայերի աչքերում»:
Ցուցահանդեսին ներկայացված սեւ ու սպիտակ եւ գունավոր լուսանկարներ: Հեղինակը համոզված է՝ ամեն նկար չէ, որ արժանի է սեւ ու սպիտակ վերածվելու:
[[gallery2]]
Հայաստանը Բրիքմանը տեսնում է պայծառ գույներով, բայց նշում է. «եթե անջատեք գույնը, կտեսնեք Հայաստանի բազմազանությունը՝ ցավն ու տառապանքը»:
Ցուցահանդեսի բացմանը հաջորդեց Բրիքմանի «Տեսնել տեսածը» թեմայով վարպետության դասը:
[[gallery3]]
Ցուցահանդեսը բաց կլինի մինչեւ օգոստոսի 30-ը:
Լենա Գեւորգյան
Լուսանկարները՝ Մարիամ Լորեցյանի