«Ոսկե ծիրան»-ը կշարունակի գործակցել դեսպանությունների հետ
«Մշտապես համագործակցել ենք Հայաստանում օտարերկրյա տարբեր առաքելությունների հետ: Այս համագործակցությունն աճում է եւ նոր ձեւեր է ստանում: Այս տարի եւս հագեցած ծրագիր ունենք, եւ փառատոնի շրջանակում կներկայացնենք գերմանական, ֆրանսիական լավագույն նոր ֆիլմերը»,- նշել է Սուսաննա Հարությունյանը:
Նա տեղեկացրել է, որ այս տարի կիրականացվի նաեւ «Շեքսպիրն ապրում է կինոյում» ծրագիրը, որը նվիրված է գրողի մահվան 400-րդ տարելիցին:
Ծրագրի շրջանակնում կցուցադրվեն Վիլյամ Շեքսպիրի ստեղծագործությունների հիման վրա նկարահանված աշխարհահռչակ ռեժիսորների աշխատանքներից մի քանիսը, այդ թվում՝ Լորենս Օլիվյեի «Համլետ»-ը, Փիթեր Բրուքի «Լիր Արքա»-ն, Ռոման Պոլանսկիի «Մակբեթ»-ը, Փիթեր Գրինըուեյի «Պրոսպերոյի գրքերը» եւ այլն:
Բացի այդ, փառատոնի շրջանակում կկայանան ռուսական մի շարք ֆիլմերի պրեմիերաներ:
Ի դեպ, փառատոնն այս տարի Երեւանից կլուսաբանեն «Կուլտուրա» հեռուստաալիքի լրագրողները:
Այս տարի եւս Ֆրանսիայի դեսպանության հետ համատեղ կիրականացվի «Ֆրանսիական նոր կինո» ծրագիրը, որի շրջանակում կցուցադրվեն վերջին շրջանում նկարահանված ֆրանսիական լավագույն ֆիլմերը: Ծրագիրը կբացի Պիեռ Լեոնի «Երկու, Ռեմի, Երկու» ֆիլմը:
«Մշակութային բազմազանությունը ֆրանսիական դիվանագիտության համար կենտրոնական դեր ունի: Այս տարի նախատեսված է ֆրանսիական ֆիլմերի ցուցադրության բազմազան ու հարուստ ծրագիր: Ի դեպ, Ժակ Տուլոմոնդի «Աննա» ֆիլմով էլ կտրվի փառատոնի մեկնարկը»,- նշել է Ֆրանսիայի դեսպանության ժամանակավոր հավատարմատար Նիկոլայ Ֆեյը:
Հայաստանում Գերմանիայի դեսպանության աջակցությամբ կիրականացվի գերմանական կինոյի օր ծրագիրը, որի շրջանակում կցուցադրվի Աննե Չոհրա Բերախեդի «24շաբաթ» ֆիլմը, որ ներառված էր Բեռլինալեի մրցութային ծրագրում:
Գերմանիայում այս ֆիլմը կինոթատրոններում կցուցադրվի միայն աշնանը:
«Դեռ անցյալ տարի համոզվեցի, թե որքան պրոֆեսիոնալ է իրականացվել փառատոնի կազմակերպչական աշխատանքն ու տեսա, թե որքան ծավալուն ու հեղինակավոր է ցուցադրվող ֆիլմերի ծրագիրը: Փառատոնի գործունեության 13 տարիների ընթացքում ցուցադրվել է շուրջ 200 գերմանական կամ համատեղ արտադրության ֆիլմեր»,- ասել է Գերմանիայի արտակարգ եւ լիազոր դեսպան Մաթիաս Քիսլերը:
Գյոթեի ինստիտուտի աջակցությամբ կներկայացվի գերմանահունգարացի ռեժիսոր եւ օպերատոր Ֆրեդ Քելմենի ֆիլմերի հետահայաց ցուցադրությունը: Կցուցադրվի նաեւ Կաննի կինոփառատոնում Ֆրիպրեսս ժյուրիի մրցանակին արժանացած Մարեն Ադեի«Թոնի Էրդման» ֆիլմը:
Փառատոնի արտամրցութային ծրագրում Լեհաստանի դեսպանության հետ համատեղ կիրականացվի «Լեհական կինոյի օր» ծրագիրը, որի ընթացքում կցուցադրվի Լոկառնոյի կինոփառատոնում լավագույն ռեժիսոր մրցանակի արժանացած Անջեյ Ժուլավսկիի «Կոսմոս» ֆիլմը: