Հիասքանչ քաղաքը սպասում է «օլիմպիական ամառվա» մեկնարկին
Մեկ ամսից էլ քիչ է մնացել, երբ «օլիմպիական ամառը» կմտնի իր լիազրությունների մեջ: Սակայն արդեն իսկ կարող ենք ասել, որ այն խոստանում է լինել ամենաթեժը, գունավորն ու անմոռանալին: Իսկական տոն-քաղաք համարվող Ռիոն այս անգամ համախմբելու է աշխարհի գրեթե բոլոր երկրներից ժամանած օլիմպիականներին:
Mediamax Sport-ն էլ որոշել է ձեզ ներկայացնել խաղերի ու Ռիոյի հետ կապված բոլոր հետաքրքիր փաստերը, որոնք տեղ չեն գտել մեր նախորդ հոդվածներում, սակայն պակաս կարեւոր չեն:
Հունվարյան գետը, անհավանական համաստեղությունն ու հիասքանչ քաղաքը
Ըստ լեգենդի, երբ պորտուգալացի հետազոտողները 1502 թվականի հունվարին ոտք դրեցին Ռիո դե Ժանեյրոյում, հայտնի Գուանաբար ծովածոցը շփոթեցին գետաբերանի հետ: Արդյունքում քաղաքն անվանվեց հունվարյան գետ, ինչն էլ պորտուգալերեն կոչվում է Ռիո դե Ժանեյրո: Ռիոն հաճախ անվանում են նաեւ «Cidade Maravilhosa», ինչը թարգմանաբար նշանակում է Հիասքանչ քաղաք:
Քաղաքի բնիկներին կոչում են կարիոկասներ, հենց այդպես են անվանվել Օլիմպիական 4 գոտիներից ամենամեծի՝ Բառռայի մարզահամալիրները, որոնք իրարից տարբերելու համար պարզապես համարակալվել են:
Բրազիլիայի դրոշի վրա պատկերված աստղերը արտացոլում են 1889 թվականի նոյեմբերի 15-ի Ռիոյի երկինքը: Դրոշին երեւում են 9 համաստեղություններ, որոնք այդքան պարզ արտացոլվել են միայն Ռիոյի երկնքում:
[[gallery1]]
Ռիոն շատ հաճախ անվանում են նաեւ հակասությունների քաղաք, երբ կողք կողքի կարելի է տեսնել տրոպիկական անտառներ, գեղեցիկ բնություն, լեռներ, հրաշալի ծովափեր, ինչպես նաեւ հարուստ ու աղքատ թաղամասեր:
Քաղաքը հայտնի է իր ֆավելաներով՝ հետնախորշերով, որից ամենամեծը Ռոչինան է, այնտեղ պաշտոնապես ապրում է 70 հազար մարդ, իսկ իրականում բնակիչների թիվը հասնում է 180 հազարի: Ռիոյում ֆավելաների ընդհանուր թիվը մոտ 600 է:
Քաղաքի խորհրդանիշներից մեկը՝ Քրիստոսի հայտնի արձանը, իր բարձր դիրքի շնորհիվ շատ անգամ է հայտնվել կայծակի թիրախում: Թեեւ ասում են 2 անգամ այն նույն տեղը չի խփում, բայց արձանի դեպքում լրիվ հակառակն է: Ամենաշատն այն տուժել է 2014-ին, երբ վնասվել է Քրիստոսի մատներից մեկը, սակայն շատ արագ էլ վերականգնվել է:
Արձանն ամենամեծերից մեկն է ամբողջ աշխարհում, օրական այցելում են 5000 զբոսաշրջիկներ: Այն վաղուց քաղաքի այցեքարտերից մեկն է դարձել:
Սակայն առանց պարերի ու կառնավալի Ռիո հնարավոր չէ պատկերացնել: Տարեկան միայն 2 մլն մարդ ժամանում է Ռիո պարային այդ տոնի մասնակիցը դառնալու համար: Քաղաքը շատ զբոսաշրջիկների գրավում է նաեւ իր ծովափերի շնորհիվ: Ռիոն ունի 50 կմ ձգվող ծովափ, որոնցից ամենահայտնին ու գեղեցիկն Իպանեման ու Կոպակաբանան են:
Վերջինս աշխարհում ամենախիտ բնակեցված վայրերից է, 1 ք/մ վրա ապրում է 25 հազ. մարդ: Օլիմպիադայի օրերին եռուզեռն այնտեղ հատկապես մեծ է լինելու, քանի որ անցկացվելու են նաեւ սպորտային միջոցառումներ:
11 մլն կերակրատեսակ, եռյակ քույրեր ու Օլիմպիական ռեկորդակիրը
Օգոստոսի 5-21-ը Հարավային Ամերիկայում կայանալիք առաջին խաղերում 42 մարզաձեւում լինելու են 306 մրցումներ: 205 երկրների 10500 մարզիկներ, որոնց թվում են մեր 31-ը, պայքարելու են 42 մարզաձեւերի 4924 մեդալների համար: Առաջին անգամ խաղերին մասնակցելու են Կոսովոն ու Հարավային Սուդանը:
Խաղերի ընթացքում լինելու են 90 հազարից ավելի աշխատակիցներ ու 45 հազ. կամավորներ: Այդքան մարզիկների ու հյուրերի համար կպատրաստվեն 11 մլն կերակրատեսակներ: Օլիմպիական ավանի ճաշասրահն ավելի մեծ է լինելու, քան 2 ֆուտբոլային դաշտերն են:
Բրազիլիայի ղեկավարությունն ու Միջազգային Օլիմպիական կոմիտեն 31-րդ ամառային Օլիմպիադան անցկացնելու համար ծախսել են 10,24 մլրդ եվրո:
Խաղերի ամենափոքր մասնակիցները ծնվել են 2003 թվականին ու հանդես են գալու լող ու մարմնամարզություն ձեւերում: Ի դեպ, երիտասարդ մասնակից է ունենալու նաեւ Հայաստանի Օլիմպիական թիմը, 15-ամյա Գայանե Չիլոյանը հանդես է գալու 200 մ վազքում:
[[gallery2]]
Իսկ ամենատիտղոսակիր մարզիկը, բնականաբար, լողորդ Մայքլ Ֆելփսն է՝ Օլիմպիական 18-ակի չեմպիոնը, նա արդեն իր 5-րդ խաղերին է մասնակցելու:
Ռիոյում առաջին անգամ խաղերի պատմության ընթացքում մասնակցելու են եռյակ քույրեր, որոնք ներկայացնում են Էստոնիան: Լեյլա, Լինա ու Լիլի Լույքերը հանդես են գալու մարաթոնյան վազքում:
Խաղերի ավանը ամենամեծն է լինելու Օլիմպիադաների պատմության ընթացքում:
Ավանում գործելու է լվացքատուն, լինելու են տարբեր խանութներ, բանկ, փոստային բաժիններ, տոմսարկղեր, վարսավիրանոցներ ու գեղեցկության սրահներ:
Գործելու է սննդի սպասարկման շուրջօրյա կենտրոն, որից օրական կարող է օգտվել մինչեւ 60 հազ. մարդ: 1800 ք/մ տարածքով մարզասրահն էլ 24 ժամ բաց է լինելու բոլոր օլիմպիականների համար:
Հասմիկ Բաբայան
Նախագծի գործընկեր