Բեգլարյանն ու Կվիրիկաշվիլին քննարկել են Լարսի բացումը
Այս մասին նշվել է Թբիլիսիում ՀՀ տրանսպորտի եւ կապի նախարար Գագիկ Բեգլարյանի եւ Վրաստանի վարչապետ Գիորգի Կվիրիկաշվիլիի հանդիպմանը, որին ներկա են եղել նաեւ Վրաստանի էկոնոմիկայի եւ կայուն զարգացման, տարածաշրջանային զարգացման եւ ենթակառուցվածքների նախարարները:
Ինչպես հաղորդում են ՀՀ տրանսպորտի եւ կապի նախարարությունից, վրացական կողմը նշել է, որ Լարսի բացման ուղղությամբ ընթանում են լայնածավալ աշխատանքներ, եւ «արվում է ամեն ինչ՝ ճանապարհն օր առաջ բացելու համար»:
Հանդիպմանը քննարկվել են նաեւ Վրաստանի տարանցիկ միջանցքի օգտագործմանն առնչվող հարցեր: Կարեւորվել է դրա զարգացումը միջազգային չափորոշիչներին համապատասխան, ինչը առաջնահերթություն է ինչպես Հայաստանի, այնպես էլ Վրաստանի համար:
Հայկական եւ վրացական կողմերը որպես Հայաստանից բեռների փոխադրման արդյունավետ տարբերակ առանձնացրել են Վրաստանի տարածքով Ռուսթավի-Սադախլո եւ Թբիլիսի-Գեգուտի ուղղությունները, ինչպես նաեւ Խաշուրի-Ախալցխա-Նինոծմինդայից դեպի Հայաստանի սահման ուղղությունը։
Հիշեցնենք, որ հունիսի 23-ից հորդառատ անձրեւների պատճառով հունից դուրս եկած Թերեք գետը հեղեղել է «Մցխեթա-Ստեփանծմինդա-Լարս» ճանապարհի 134-135 կմ հատվածը, եւ բեռնատարները երթեւեկում են Բաթումի-Փոթի-Նովոռոսիյսկ նավահանգիստների ուղղությամբ՝ ավտոմոբիլային լաստանավերի միջոցով: