Շտայնմայեր. Պետք է ջանանք խուսափել ապրիլյան դեպքերի կրկնությունից
Այս մասին Ֆրանկ-Վալտեր Շտայնմայերն ասել է այսօր Երեւանում ՀՀ ԱԳ նախարար Էդվարդ Նալբանդյանի հետ համատեղ մամուլի ասուլիսում` պատասխանելով Մեդիամաքս-ի թղթակցի հարցին:
ԵԱՀԿ գործող նախագահի խոսքերով, Հարավային Կովկաս իր այցի օրակարգի առաջնային եւ գլխավոր թեման ԼՂ կարգավորման հարցն է:
«Մոտ երկու ամիս է անցել այն պահից, երբ այս տարածաշրջանում ռազմական գործողություններ սանձազերծվեցին. Կարծում եմ, հակամարտության բոլոր կողմերի, ինչպես նաեւ ԵԱՀԿ-ի համար պարզ է դարձել, որ տեւական ստատուս-քվոն հնարավոր չի լինի պահպանել. պետք է ջանանք խուսափել այդ դեպքերի կրկնությունից եւ փորձենք ջանքերն ուղղել այս հակամարտության տեւական լուծում գտնելուն»,- ասել է Ֆրանկ-Վալտեր Շտայնմայերը:
Նրա խոսքերով, սկզբունքորեն ճիշտ ժամանակն է, որպեսզի բոլոր ջանքերն ուղղվեն ԼՂ հիմնախնդրի խաղաղ լուծման բանակցություններն ավելի առարկայական դարձնելուն:
«Այն, ինչ կրկնվել է տարեսկզբին, իրավունք չունի կրկնվելու: Պետք է փորձենք նոր եզրեր գտնել բանակցությունների շարունակման, զինադադարի կայունացման եւ դեսպան Կասպշիկի թիմի ընդլայնման համար», - ասել է Շտայնմայերը:
Նա հույս է հայտնել, որ այս տարվա ընթացքում արդեն կսկսվեն առարկայական բանակցությունները Հայաստանի եւ Ադրբեջանի միջեւ:
«Ակնհայտ է, որ Վիեննայում եւ Սանկտ-Պետերբուրգում կայացած հանդիպումներից հետո դրական պահի ենք հասել, եւ ակնկալիքներ կան եւ՛ հայկական, եւ՛ ադրբեջանական կողմից. վճռական քայլեր են պետք»,- ասել է ԵԱՀԿ գործող նախագահը:
ՀՀ ԱԳ նախարար Էդվարդ Նալբանդյանն իր հերթին ասել է, որ ԵԱՀԿ-ում նախագահության առաջին իսկ պահից Գերմանիան սատարել է հակամարտության գոտում հետաքննությունների մեխանիզմի ստեղծման, վստահության մեխանիզմների հաստատման ԵԱՀԿ Մինսկի խմբի համանախագահների առաջարկությունը:
Նա հիշեցրել է, որ Հայաստանը բազմիցս դրական դիրքորոշում է հայտնել այդ առաջարկների կապակցությամբ. ՀՀ ԱԳ նախարարը նկատել է, որ հունիսին ԵԱՀԿ ֆինանսական հանձնաժողովի հաստատմանը երեք անգամ դրվել է հետաքննության մեխանիզմի ստեղծման հարցը: Նալբանդյանի խոսքերով, ԵԱՀԿ մասնակից բոլոր երկրները հանդես են եկել կողմ, միայն մեկ երկիր՝ Ադրբեջանն է դեմ եղել:
Էդվարդ Նալբանդյանը հավելել է, որ, եթե լիակատար ձեւով հարգվեն 1994 թ. կնքված եռակողմ հրադադարի համաձայնագիրը եւ ստեղծվեն համապաստախան պայմաններ Վիեննայում եւ Սանկտ-Պետերբուրգում ձեռք բերված պայմանավորվածությունների իրականացման համար, ապա հնարավոր կլինի շարունակել բանակցությունները: