Ռիո-2016. Հայաստանի հավաքականների մարզումները
Օլիմպիական խաղերի մեկնարկին մի քանի ամիս ժամանակ է մնացել: Այդ ընթացքում հայ մարզիկներն, ովքեր արդեն ապահովել են իրենց մասնակցությունն այդ կարեւոր մրցաշարում, սկսել են պատրաստվել խաղերին:
Mediamax Sport-ն առանձնացրել է այն մարզաձեւերը, որոնք հանդես են գալու թիմային պայքարում:
Հայաստանի մարմնամարզության թիմը մինչ Օլիմպիական խաղեր մեկնելն այս ամիս մասնակցելու է Եվրոպայի առաջնությանը: Մինչ այդ Հակոբ Սերոբյանի գլխավորությամբ մարմնամարզիկները պարապում են Երեւանում: ԵԱ-ում, որտեղ Հայաստանը ներկայանալու է նաեւ թիմային պայքարում, ելույթ են ունենալու նաեւ Ռիոյի ուղեգիր նվաճած Արթուր Դավթյանն ու Հարություն Մերդինյանը:
Ծանրամարտի տղամարդկանց հավաքականը մի քանի օր առաջ է ավարտել ծաղկաձորյան հավաքը: Փաշիկ Ալավերդյանի թիմի հաջորդ հավաքատեղին լինելու է Աբովյանը, մայիսի 18-ից հունիսի 5-ը նրա յոթ սաները կրկին փորձելու են մարզչին ապացուցել, որ իրենք են Օլիմպիադային մասնակցելու հիմնական հավակնորդները: Հայաստանի ընտրանին Ռիոյում ներկայանալու է 5 հոգով, իսկ թե ովքեր կմեկնեն մրցավայր՝ գլխավոր մարզիչը դեռ չի հայտնել:
Հայաստանի ծանրամարտի կանանց հավաքականը, որը Ռիոյում ներկայացնելու են Նազիկ Ավդալյանն ու Հռիփսիմե Խուրշուդյանը, մայիսի 15-ից սկսել է նախապատրաստվել Օլիմպիական խաղերին: Արտաշես Ներսիսյանի թիմը մարզվում է Ծաղկաձորում, որտեղ մնալու է մինչեւ հունիսի 4-ը:
Բռնցքամարտիկներն առայժմ պարապում են անձնական մարզիչների մոտ: Նարեկ Աբգարյանը, Արամ Ավագյանն ու Վլադիմիր Մարգարյանը Երեւանում են, իսկ Արթուր Հովհաննիսյանը՝ Գյումրիում: Կարեն Աղամալյանի գլխավորությամբ նրանք հունիսին մեկնելու են Կիեւ, որտեղ համատեղ հավաք են ունենալու Ուկրաինայի, Բելառուսի ու Հունաստանի ընտրանիների հետ:
Լեւոն Ջուլֆալակյանի հունահռոմեական ոճի ըմբշամարտի հավաքականն էլ պատրաստվում է Ծաղկաձորում: Բացի Ռիո մեկնող չորս ըմբիշից (Միհրան Հարությունյան, Արսեն Ջուլֆալակյան, Մաքսիմ Մանուկյան, Արթուր Ալեքսանյան), այստեղ մարզվում են մեծահասակների ու երիտասարդական ընտրանու անդամները: Ծաղկաձոր է ժամանել նաեւ Վենեսուելայի թիմը, որը Ռիոյում ներկայանալու է չորս մարզիկով:
Ազատ ոճի ըմբիշները եւս մարզվում են անհատական ծրագրով: Արայիկ Բաղդադյանի խոսքով, իրենք հունիսի 9-ից հավաքվելու են Ծաղկաձորում: Ազատ ոճայիններից Օլիմպիական խաղերին պատրաստվելու են Գառնիկ Մնացականյանը, Դավիթ Սաֆարյանը, Գեորգի Կետոեւը եւ Լեւան Բերիանիձեն:
Նախագծի գործընկեր