2-րդ անգամ նույն գետը մտնելիս կամ 15 տարի անց. Վարուժան Սուքիասյան
Ընդամենը մի քանի օրից առաջին անգամ գործի մեջ կտեսնենք Հայաստանի ազգային հավաքականի նոր գլխավոր մարզիչ Վարուժան Սուքիասյանին:
Անցյալում թողնելով նախորդ անհաջող ընտրական մրցաշարը, բազմաթիվ ձախողումներն ու չստացված փորձերը, հավաքականը հերթական անգամ նոր մարզչի հետ կսկսի ամեն ինչ զրոյից:
Սկիզբը բոլոր մարզիչների հետ էլ միշտ խոստումնալից է լինում: Բազմաթիվ հուսադրող ու հեռուն գնացող խոստումներ են լինում, անհաղթահարելի բարձունքներ գրավելու ջանքեր արվում:
«Ազգի համար ես ամեն ինչ էլ պատրաստ եմ անել: Մաքսիմալիստ եմ ու ձգտելու եմ առավելագույնին: Գիտեմ, որ գերլարված աշխատանք է սպասվում ու ձգտելու եմ ցույց տալ լավ արդյունք: Մեր առաջնային նպատակն է լինելու ագրեսիվ, համարձակ ու գեղեցիկ ֆուտբոլ ցուցադրել: Կարեւոր առաջադրանքն ԱԱ-2018-ի ընտրական մրցաշարում լավագույնս մասնակցելն է»,- դեռ նախորդ տարվա դեկտեմբերին նշանակումից մի քանի օր անց մեզ հետ զրույցում ասել էր Վարուժան Սուքիասյանը:
[[gallery1]]
Սուքիասյանի ասածներին ոչ հավատալու, ոչ էլ կասկածելու հիմքեր չունենք: Մանավանդ շալանդյան առատ ու ճոխ խոստումներից հետո կարող ենք միայն մեր աչքի տեսածին հավատալ: Այդ պատճառով էլ միայն ժամանակն ու հավաքականի արդյունքները Սուքիասյանի խոսքերի լավագույն վկայությունը կլինեն:
Մարզիչը նաեւ կտրուկ նշել էր, որ իր թիմում չեն լինի նախկին կազմի մի քանի խաղացողներ: Եվ, իսկապես, նրանցից առնվազն երեքի համար այսուհետ փակ են լինելու դեպի հավաքական տանող բոլոր ճանապարհները: Սակայն ոչ թե Վարուժան Սուքիասյանի որոշմամբ, այլ Ռուբեն Հայրապետյանի:
Առհասարակ, մարզիչները չեն սիրում վերադառնալ այն ակումբներն ու հավաքականները, որտեղ ժամանակին աշխատել են: Ասում են՝ նույն գետը երկու անգամ չեն մտնում, սակայն բացառություններ եւս լինում են: Մանավանդ, որ մեր հավաքականի պարագայում դա նորություն չէ:
Սուքիասյանն էլ 15 տարի անց կրկին վերադառնում է իր հին կարգավիճակին: Հեռավոր 2001-2002 թվականներին նա արդեն աշխատել է Հայաստանի ընտրանու հետ ԱԱ-2002-ի ընտրական մրցաշարում: Այն ժամանակ հայ ֆուտբոլիստները խմբում վերջին՝ 6-րդ տեղն են զբաղեցրել 5 միավորով: Մեր թիմը ոչ մի հաղթանակ չի գրանցել՝ բոլոր միավորները վաստակելով ոչ-ոքիներով:
Նա աշխատել է նաեւ երիտասարդական ընտրանու հետ, սակայն նույնպես լավ արդյուքներով գլուխ գովելու առիթ չկա: Թերեւս ամենանշանակալից հաղթանակը երիտասարդական թիմի եղել է Թուրքիայի նկատմամբ: Կառլեն Մկրտչյանի ու Հենրիխ Մխիթարյանի գոլերի շնորհիվ հայերը 2:1 հաշվով կամային հաղթանակ են գրանցել «Հրազդան» մարզադաշտում:
Ինչպես եւ հիմա, այն ժամանակ էլ ազգային թիմը Սուքիասյանը գլխավորել է ընկերական խաղից առաջ: Մարզչի նորամուտի խաղում ֆուտբոլիստներին հաջողվել է սեփական հարկի տակ 2:1 հաշվով հաղթել Մոլդովային:
[[gallery2]]
Մինչ Բելառուսի դեմ խաղը, Սուքիասյանը նաեւ փոքրիկ «խաղ» է ունեցել թիմի ղեկին: Հայաստանի առաջնությունում հանդես եկող ֆուտբոլիստները նրա գլխավորությամբ մարտի սկզբին հանդիպում են անցկացրել երիտասարդական ընտրանու հետ ու հաղթել: Սակայն 25 րոպեանոց 3 խաղակեսերով ու նման կազմով հնարավոր չէ որեւէ եզրակացություն անել ֆուտբոլիստների վիճակի ու մարզչի աշխատանքի մասին:
59-ամյա մարզիչը երկար աշխատանքային փորձ ունի (նորամուտը մարզչի կարգավիճակում նշել է 1989-ին «Լոռի» թիմում), սակայն 2010-2015 թթ. այլ գործունեություն է ծավալել: Նա եղել է Երեւանի քաղաքապետարանի ենթակայության տակ գործող «Բնակչության հատուկ սպասարկում» ՓԲԸ-ի տնօրենը, որը կոորդինացնում է քաղաքի բոլոր գերեզմանատների աշխատանքը:
Մարզչական գործունեության կրկին վերադարձել է 2015-ին ու գլխավորել «Արարատը», հասցրել է ստանալ «Լավագույն մարզչի» մրցանակը:
Պաշտոնը ստանձնելիս մարզիչը խոստովանել էր, որ գիտակցում է իր աշխատաքի ողջ պատասխանատվությունն ու դժվարությունը: Իսկապես, ազգային հավաքական գլխավորելը նախ եւ առաջ պատասխանատվություն է ողջ ժողովրդի առաջ, ֆուտբոլիստներից յուրաքանչյուրի, պատմության…
Վարուժան Սուքիասյանին բաժին հասած հավաքականը ծանր ժամանակներ է ապրում ու բազմաթիվ խնդիրներ ունի, սակայն անկախ ամեն ինչից այն նախ եւ առաջ մեր հպարտությունն է, որի ամեն հաղթանակ ու անհաջողություն յուրաքանչյուրինս է:
Հասմիկ Բաբայան