ԼՂ կարգավորումը մնում է ԵՄ առաջնահերթ խնդիրներից մեկը
Այս մասին ասված է հունվարի 18-ին Բրյուսելում կայացած Հայաստան-Եվրոպական Միություն համագործակցության խորհրդի նիստի արդյունքում ԵՄ հրապարակած հաղորդագրության մեջ:
Հանդիպմանը ԵՄ պատվիրակությունը գլխավորում էին ԵՄ խորհրդի նախագահությունը ներկայացնող Նիդեռլանդների արտաքին գործերի նախարար Բերտ Կունդերսը եւ Եվրոպական հանձնաժողովի եվրոպական հարեւանության քաղաքականության եւ ընդլայնման հարցերով հանձնակատար Յոհանես Հանը: ՀՀ պատվիրակությունը գլխավորում էր ՀՀ արտաքին գործերի նախարար Էդվարդ Նալբանդյանը:
«Կողմերը ողջունել են բանակցությունների մեկնարկը եւ ներկայացրել հետագա քաղաքական ուղղությունը, որը վերաբերում է ԵՄ-Հայաստան ապագա համաձայնագրին՝ կոչված փոխարինելու ներկայիս հնացած ԵՄ-Հայաստան Գործընկերության եւ համագործակցության համաձայնագրին եւ վերականգնելու երկկողմ հարաբերությունները՝ Եվրոպական հարեւանության նորացված քաղաքականության եւ Արեւելյան գործընկերությունը լայն շրջանակում»,- ասված է հաղորդագրության մեջ:
«Հայաստան-ԵՄ համագործակցության խորհուրդը քննարկել է Հայաստանի վերջին քաղաքական, տնտեսական եւ սոցիալական բարեփոխումները: ԵՄ-ն ի գիտություն է ընդունել այդ բարեփոխումների ընթացքում արձանագրված առաջընթացը եւ Հայաստանի հանձնառությունը՝ շարունակելու այդ դրական քայլերը, միաժամանակ՝ խրախուսելով Հայաստանին արագացնել բարեփոխումները կոնկրետ ոլորտներում, մասնավորապես՝ ժողովրդավարության եւ օրենքի գերակայության, կոռուպցիայի դեմ պայքարի, մարդու իրավունքների եւ հիմնարար ազատությունների, սահմանադրական եւ դատական բարեփոխումների ոլորտներում: Առանձնահատուկ ուշադրություն է դարձվել ընտրական համակարգի բարեփոխման անհրաժեշտությանը, նոր Սահմանադրության պատշաճ ներդրմանը եւ մեդիայի ազատության, ինչպես նաեւ քաղաքացիական հասարակության կարեւոր դերի ապահովմանը:
ԵՄ-ն հաստատել է իր շարունակական աջակցությունը Հայաստանի բարեփոխումների ջանքերին, որոնք ներառում են մուտքի արտոնագրերի դյուրացման եւ ռեադմիսիայի համաձայնագրերի ներդրումը, եւ խրախուսել է Հայաստանին լավագույնս օգտվել ԵՄ օժանդակությունից, որը 2014-2017 թթ. նախատեսում է 140 եւ 170 մլն եվրո անհատույց աջակցություն՝ ուղղված մասնավոր հատվածի զարգացմանը, պետական կառավարման բարեփոխումներին եւ արդարադատության ոլորտի բարեփոխումներին»,- ասված է հաղորդագրության մեջ:
Համագործակցության խորհուրդը ողջունել է Հայաստան-ԵՄ Շարժունակության շուրջ գործընկերության ներդրումը:
«Համագործակցության խորհուրդն անդրադարձել է նաեւ ընդհանուր հետաքրքրություն ներկայացնող տարածաշրջանային խնդիրների, այդ թվում՝ Լեռնային Ղարաբաղի հակամարտության կարգավորմանը: Այս կապակցությամբ ԵՄ-ն վերահաստատել է, որ ստատուս քվոն անկայուն է, եւ որ այս հակամարտության խաղաղ կարգավորումը շարունակում է մնալ ԵՄ առաջնահերթ խնդիրների թվում:
ԵՄ-ն վերահաստատել է զսպվածության իր կոչը եւ հետագա ներգրավվածությունը ԵԱՀԿ-ի կողմից ղեկավարվող բանակցային գործընթացին: Ավելին, ԵՄ-ն վերահաստատել է իր աջակցությունը ԵԱՀԿ Մինսկի խմբի միջնորդական ջանքերին՝ ուղղված ԼՂ խնդրի խաղաղ կարգավորմանը:
ԵՄ-ն ողջունել է 2015թ. դեկտեմբերի 19-ին ՀՀ եւ Ադրբեջանի նախագահների հանդիպումը Շվեյցարիայում:
ԵՄ-ն վերահաստատել է նաեւ իր պատրաստակամությունը՝ աջակցելու ԼՂ հակամարտությունից տուժած շրջանների վերակառուցման եւ վերականգնմանը: