Ռուսաստանը «փաթեթային» համաձայնության հասնելու հույս ունի
Երեւան: Մեդիամաքս: Ռուսաստանի ԱԳՆ-ի ԱՊՀ երկրների չորրորդ վարչության տնօրեն Դենիս Գոնչարը ծավալուն հարցազրույց է տվել «Ռուսաստանն՝ այսօր» գործակալությանը, որում անդրադարձել է Հայաստանի եւ Ադրբեջանի հետ Ռուսաստանի հարաբերություններին։
Ներկայացնում ենք հատվածներ հարցազրույցից:
«Պատմական նշաձող»
«Փետրվարի 22-ին Ռուսաստանի եւ Ադրբեջանի նախագահների կողմից Դաշնակցային համագործակցության մասին հռչակագրի ընդունումը, անշուշտ, պատմական նշաձող է սահմանել մեր երկրների հարաբերություններում։
Փաստաթուղթը նպատակներ է դնում համագործակցության առանցքային ոլորտներում եւ հստակ ուղղություններ է սահմանում հետագա համատեղ աշխատանքի համար գալիք տարիների համար»:
«Հատուկ հարգանքի է արժանի»
«Կցանկանայի ընդգծել, որ Բաքվի սկզբունքային վերաբերմունքը Մոսկվայի հետ դաշնակցային հարաբերությունների զարգացման նկատմամբ հատուկ հարգանքի է արժանի միջազգային հարաբերությունների համար այս դժվարին ժամանակներում։
Մենք զարգացնելու ենք մեր դաշնակցային հարաբերությունները՝ հաշվի չառնելով արտաքին կոնյուկտուրան»։
«ԵԱՏՄ-ի հետ մերձեցումը բխում է Ադրբեջանի շահերից»
«Մեր կարծիքով, ԵԱՏՄ-ի հետ մերձեցումը լիովին համապատասխանում է Ադրբեջանի շահերին։ Ադրբեջանցի գործընկերները կարող են լիապես օգտվել միության ապրանքների, ծառայությունների եւ կապիտալի ընդհանուր շուկաներից»։
«Փաթեթը» համաձայնեցվում է
«Տարածաշրջանում տրանսպորտային հաղորդակցության վերականգնումը հայ-ադրբեջանական հարաբերությունների կարգավորման առանցքային տարրերից է։ Եռակողմ աշխատանքային խմբի շրջանակներում համաձայնեցվում է խոշոր նախագծերի «փաթեթ»՝ շեշտը դնելով Ադրբեջանի եւ Հայաստանի միջեւ երկաթուղային եւ ճանապարհային կապի գործարկման վրա՝ դեպի հարեւան երկրներ հնարավոր ելքով։ Նման նախագծերը ներառում են երկաթուղու, ինչպես նաեւ Ադրբեջանի արեւմտյան շրջանների եւ Նախիջեւանի Ինքնավար Հանրապետության միջեւ ավտոմայրուղու կառուցումը Հայաստանի Սյունիքի մարզի տարածքով։
Հուսով ենք, որ եռակողմ աշխատանքային խմբի հաջորդ հանդիպմանը մեզ կհաջողվի «փաթեթային» համաձայնության հասնել։ Դրանից հետո կմեկնարկի կոնկրետ նախագծերի իրականացումը, որոնց կկարողանան միանալ բոլոր շահագրգիռ ընկերությունները։ Համոզված եմ, որ հայտարարված մրցույթների արդյունքներով մասնակիցների թվում կլինեն ռուսաստանյան օպերատորներ»։
Լաչինի միջանցքը
«Առանցքային է, որ Լաչինի միջանցքի շահագործման ռեժիմը չի փոխվի։ Ռուս խաղաղապահները տեղափոխվել են ժամանակավոր ճանապարհ, իսկ 2023 թվականի ապրիլի 1-ից նրանք նոր երթուղու վրա կլինեն»։
Համանախագահության ձեւաչափը եւ «քմահաճույքները»
«ԵԱՀԿ Մինսկի խմբի համանախագահության ձեւաչափը կաթվածահար եղավ այն բանից հետո, երբ փետրվարի 24-ին ամերիկացի եւ ֆրանսիացի համանախագահները «սառեցրեցին» իրենց ռուս գործընկերոջ հետ փոխգործակցությունը՝ առանց նախնական ծանուցման եւ խորհրդակցությունների։ Եռյակի աշխատանքի հիմնական սկզբունքի՝ կոնսենսուսի կանոնի նման կոպիտ խախտում տեղի ունեցավ ԵԱՀԿ Մինսկի խմբի երեսնամյա պատմության ընթացքում առաջին անգամ։
Որոշ ժամանակ անց Փարիզից սկսեցին անուղղակի ազդակներ գալ համանախագահների մակարդակով շփումները վերսկսելու պատրաստակամության մասին՝ կարծես ոչինչ էլ չէր եղել։ Մինչդեռ մենք հստակ բացատրություն չենք ստացել հարթակի աշխատանքը արգելափակելու պատճառների մասին։ Երաշխիքներ չկան, որ նման դեստրուկտիվ գործողություններն ապագայում չեն կրկնվի մեկ այլ անհասկանալի պատրվակով։
Ադրբեջանի եւ Հայաստանի միջեւ հարաբերությունների կարգավորման գործընթացները չպետք է կախված լինեն արեւմտյան խաղացողների քմահաճույքներից»։