35 տարի անց Իսպանիայից դուրս. «Ռեալն» ու «Բարսան» կհանդիպեն ԱՄՆ-ում
Մայամիի «Hard Rock» մարզադաշտում թիմերն ԱՄՆ-ում ընթացող հավաքի ու Չեմպիոնների գավաթի շրջանակներում կորոշեն ուժեղագույնին:
Իսպանիայից դուրս թիմերը միայն մեկ անգամ են հանդիպել՝ 1982-ին: 35 տարի առաջ Վենեսուելայում կայացած խաղն ավարտվել է 1:0 հաշվով, «Ռեալի» միակ գնդակը խփել է Վիսենտե դել Բոսկեն:
Այսօր արդեն աստղային կազմեր ունեցող թիմերի շուրջ հետաքրքրությունն էլ ավելի է աճել: ԱՄՆ են ժամանել երկրպագուներ Հարավային ու Հյուսիսային Ամերիկաների տարբեր երկրներից: Շուրջ 65 հազար հանդիսական տեղավորող ստադիոնում կազմակերպիչները խոստացել են հրաշալի շոու կազմակերպել:
[[gallery1]]
Ի դեպ, տոմսերն արդեն սպառվել են, սակայն նրանք, ովքեր չեն հասցրել ձեռք բերել, բայց շատ են ցանկանում խաղին հետեւել հենց ստադիոնից, պետք է շատ գումար վճարեն: Նշվում է, որ «սեւ շուկայում» «Բարսա»-«Ռեալ» դիմակայության տոմսերի գինը հասել է 900 դոլարի:
Հանդիպումը լուսաբանելու համար հավատարմագրվել են հարյուրավոր լրագրողներ: Միայն ESPN-ն Հարավային Ֆլորիդա է ուղարկել 25 լրագրողի, որպեսզի հեռարձակման ժամանակ ոչ մի խնդիր չառաջանա:
Բացի այս, կայանալու է նաեւ երկու թիմերի լեգենդների խաղը: «Bayfront Park»-ում «Casa Clasico» միջոցառմանը մասնակցելու են Պատրիկ Կլյուվերտը, Ֆերնանդո Հիերոն, Կարլես Պույոլն ու այլ հայտնիներ:
Կազմակերպիչները մտածել են նաեւ նրանց մասին, ովքեր տոմս չեն ունենալու: Կենդանի երաժշտություն, ուրախ մթնոլորտ, մեծ էկրանների վրա ցուցադրվող հանդիպում. Մայամիում երկրպագուները հաստատ չեն ձանձրանալու:
[[gallery2]]
Ֆուտբոլային իրարանցումից հեռու չեն մնացել նաեւ տուրիստական ընկերությունները: «Սուպեր Կլասիկո փաթեթի» մեջ հանդիպման տոմսը եւ մեկ գիշերը հյուրանոցում արժե 750 դոլար:
Չեմպիոնների Գավաթը ընթանում է ԱՄՆ-ի տարբեր քաղաքներում: Այն հավաքել է եվրոպական ամենահայտնի թիմերին՝ «Մանչեսթեր Յունայթեդ», «Յուվենթուս», «Մանչեսթեր Սիթի», «Ռոմա» եւ այլն: Սակայն հենց իսպանական այս երկու թիմին է հաջողվել ամենամեծ հետաքրքրությունն ու իրարանցումն առաջացնել:
ԱՄՆ-ում վստահ են, որ ֆուտբոլային տոնը ստացվելու է, իսկ այն, որ «Ռեալն» ու «Բարսան», չնայած ընկերական հանդիպման բնույթին, ձգտելու են հաղթել ոխերիմ հակառակորդին, հաստատ է: Հանդիպումը մեկնարկելու է շաբաթ օրը, Մայամիի ժամանակով երեկոյան 7:30 (Երեւանի ժամանակով գիշերը 3:30):