Рубль курсы нинди булган очракта, бәяләр кимү сизеләчәк
Икътисадчы Василий Колташов «Татар-информ»га белдергәнчә, инфляциянең сизелерлек кимүен россиялеләр рубль тагын да ныграк ныгыган очракта гына тоячак.
«Әгәр рубль чын мәгънәсендә ныгый башласа, ягъни кимендә 1 доллар өчен 50 сум дәрәҗәсенә якынлашса, нәкъ шул чакта гына кешеләр инфляциянең акрыная башлавын, ә кайбер очракларда бәяләрнең хәтта төшүен дә сизәчәк», – дип билгеләп үткән ул.
Аның сүзләренчә, бу бигрәк тә импортланган товарлар бәясендә ачык күренәчәк: җиләк-җимеш, сәнәгать товарлары һәм башка күп кенә продукциядә.
Шул ук вакытта Колташов ассызыклаганча, рубльнең мондый дәрәҗәдә ныгуы икътисади факторларга гына бәйле түгел.
«Мондый ныгу, хәтта аннан да көчлерәк булуы – сәяси карарлар мәсьәләсе», – дип өстәгән ул.
Россия Үзәк банкы мәгълүматлары буенча, бүген доллар курсы 81,9 сумга кадәр төшкән, ә евро курсы 94,73 сумга кадәр кимегән.