Станіслаў Суднік: з рокашам па жыцці
Калі такі чалавек называе цябе сваім блізкім сябрам, можна зафанабэрыцца. Афіцыйныя крыніцы сведчаць, што Станіслаў Вацлававіч беларускі пісьменнік, паэт, перакладчы, журналіст, краязнаўца, стэнограф, падпалкоўнік.
Падпалкоўнік Станіслаў Суднік
Тое — яшчэ не поўны пералік рэгалій гэтага таленавітага чалавека і самаадданага беларуса. Ён непаўторны у сваім амплуа рэдактар і адміністратар. Яго намаганнямі выходзіць газета “Наша слова”, часопісы “Лідскі летапісец”, “Нясвіжскія каеты” і яшчэ шэсць літаратурных альманахаў.
Станіслаў Суднік нарадзіўся 21 верасня (па некаторых звестках 24-га) 1954 года ў засценку Сейлавічы Нясвіжскага раёна на Міншчыне. Сваё прозвішча ён тлумачыць так: “Далёкія продкі прымалі ўдзел у вызвольным паўстанні і мелі судовы вырак”.
Вясковы хлопец у 1977 годзе скончыў Мінскую вышэйшую інжынерную зенітную ракетную вучэльню. Напачатку служыў у ракетна-зенітных дывізіёнах на Урале, затым з 1983 па 1992 год у Прыазерску (Казахстан). У 1992 годзе ў Цвяры скончыў Ваенную камандную акадэмію супрацьпаветранай абароны.
Распад Саюза і ўтварэнне незалежнай Беларусі сапраўдных яе патрыётаў паклікаў да сябе. Станіслаў Суднік вяртаецца на Радзіму. У сваёй справе ён спецыяліст найвышэйшага класа. За гады службы ўдзельнічаў у болей чым 300 пускаў баявых ракет і яшчэ ў 200 быў у якасці назіральніка. Па вяртанні ў Беларусь падпалкоўніка Судніка прызначылі камандзірам ракетнага дывізіёна пад Мастамі. Тут нас і звёў лёс.
Беларусь была для яго, дзе б ні быў, першым чыннікам. Дома заўжды размаўляў па-беларуску, выпісваў беларускамоўныя выданні. У 1990 годзе распачаў у Прыазёрску выпуск газеты “Рокаш” (мяцеж), арганізаваў нядзельную беларускую школу.
Пасля Мастоў Суднік нядоўга служыў у мястэчку Рось. Зараз ён жыве ў Лідзе.
Што датычыць беларускай стэнаграфіі, то ён першы, хто гэты від хуткапісу паставіў на беларускія рэйкі. Тры гады выкладаў гэты прадмет у Лідскім каледжы, у 2009 годзе выдаў падручнік.
Акрамя іншага, Станіслаў Суднік шмат займаецца грамадскай дзейнасцю. Ён намеснік старшыні Таварыства беларускай мовы.