Բագրատաշենի մաքսակետի կամուրջը շահագործման կհանձնվի 2018-ին
Հայաստան-Վրաստան պետական սահմանի «Բագրատաշեն-Սադախլո» անցակետի տարածքում Դեբեդ գետի վրա կառուցվելիք նոր կամուրջը 2018-ին շահագործման կհանձնվի:
Ինչպես հայտնել են ՀՀ տրանսպորտի նախարարության մամուլի ծառայությունից` այս մասին այսօր ասել է «Հյուսիս-հարավ ճանապարհային միջանցքի ներդրումային ԾԻԿ» ՊՈԱԿ-ի գլխավոր գործադիր տնօրեն Արթուր Սարգսյանը` կամուրջի կառուցման մրցույթին մասնակցելու հայտ ներկայացրած ընկերությունների հետ հանդիպման ժամանակ:
«Հաղթող ընկերության հետ պայմանագիրը նախատեսվում է կնքել մինչեւ դեկտեմբերի 28-ը: Կամրջի նախագծման աշխատանքներն իրականացվելու են 2017-ի հունվար-մարտ ամիսներին, որից հետո կմեկնարկի բուն շինարարությունը` ավարտվելով 2018-ին»,- նշել է նա:
Նոր կամուրջն ունենալու է երկու առանձին թռիչքային ծածկ, որոնք միացնելու են Դեբեդ գետի հայկական կողմի սահմանային անցակետի առկա ենթակառուցվածքը վրացական կողմի ենթակառուցվածքին։
Այն ունենալու է չորս երթեւեկելի գոտի: Ակնկալվում է, որ այն կդյուրացնի երկրների բեռնափոխադրումների եւ ուղեւորափոխադրումների սպասարկման որակը` ապահովելով ժամանակի խնայողություն, անվտանգ ու հարմարավետ շարժ:
Կամրջի կառուցման, նախագծման եւ շինարարության արժեքը մոտ €9 մլն է (շուրջ $10 մլն), որի կեսը ֆինանսավորելու է վրացական կողմը: Ծրագիրն իրականացվում է Վերակառուցման եւ զարգացման եվրոպական բանկի (ՎԶԵԲ) վարկային միջոցներով:
Նախարարությունում տեղեկացրել են, որ «Բարեկամության» կամրջի կառուցման աշխատանքները համակարգելու նպատակով ստեղծվել է հայ-վրացական միջկառավարական հանձնաժողով, որի անհատական կազմը հաստատել են Հայաստանի եւ Վրաստանի կառավարությունները։