Տնտեսագետ․ Գազի գնի իջեցումը, ամենայն հավանականությամբ, կարճաժամկետ կլինի
![Տնտեսագետ․ Գազի գնի իջեցումը, ամենայն հավանականությամբ, կարճաժամկետ կլինի](http://gdb.rferl.org/AEE9768A-8703-40AF-9C24-5D541C722287_w800_h450.jpg)
Տնտեսագետ Արտակ Մանուկյանը մտահոգված է նրանով, որ, օրինակ, անապահով ընտանիքներին տրամադրվող աջակցությունը ոչ թե «Գազպրոմ Արմենիա»-ի, այլ պետական բյուջեի միջոցների հաշվին է լինելու։
«Անկհայտ է, որ մեր պետական բյուջեն իր նվազ եկամուտներով չի կարող այս ռազմավարությունը երկար քաշել, և այս առումով, սա շատ կարճաժամկետ գործիք է: Վստահաբար, եթե նույնիսկ հունվարի 1-ին, որ այն ամենաարագ ժամանակաշրջանն է, երբ որ սակագինը կարող է կյանքի կոչվել, մենք հուլիսի 1-ին հակառակ ազդեցությունը ևս կզգանք», - «Ազատության» հետ զրույցում ասաց Մանուկյանը:
«Գազպրոմ Արմենիա» ընկերությունը Հայաստանում սպառողներին վաճառվող բնական գազի սակագների վերանայման հայտով երեկ դիմել է Հանրային ծառայությունները կարգավորող հանձնաժողով։ Առաջարկվում է ամսական մինչև 10 հազար խորանարդ մետր ծավալով գազ սպառողների համար 1 խորանարդ մետրի դիմաց վճարվող 146,7 դրամը նվազեցնել մինչև 139 դրամ: Ընտանեկան կամ սոցիալական նպաստ ստացողների համար նախատեսվում է գազի գինն ավելի շատ իջեցնել. 100 դրամ` 1 խմ-ի դիմաց, սակայն միայն այն պարագայում, եթե այդ խմբին պատկանողները տարեկան 600 խմ-ից ավելի գազ չսպառեն: Ջերմոցային տնտեսությունների դեպքում գինն առաջարկվում է նվազեցնել շուրջ 10 տոկոսով։
Այս նվազեցումը Ազգային ժողովի Հայ ազգային կոնգրեսի խմբակցության քարտուղար Արամ Մանուկյանն ոչ թե սոցիալական, այլ քաղաքական քայլ է համարում։ Նա համոզված է, որ
սա կառավարության նախընտրական քայլն է խորհրդարանական ընտրություններին ընդառաջ․ - «Նազարյանի հանձնաժողովը էս հինգ տարի ինչի՞ էս լավ առաջարկով հանդես չէր գալիս․․․ եթե կա էդ ռեսուրսը: Կառավարությունը ինչի՞ մինչև հիմա հանդես չէր գալիս: Չէի՞ք զգում, որ էստեղ ոչ թե սոցիալական խնդիրն ա լուծվում, այլ լրիվ ուրիշ խնդիր ա լուծվում: Առավել ևս՝ որ հիմա ա լուծվում: Ուրեմն ակնհայտ ա, թե ինչի համար ա լուծվում»:
Մանուկյանը պնդում է, որ գերշահույթներ ստացող «Գազպրոմ Արմենիան» սակագնի զգալի իջեցում կարող էր անել շատ ավելի վաղ՝ մինչև նախընտրական շրջանը․ - «Իհարկե, կամայական նվազեցումը սպառողի համար դրական է․ դա որպես աքսիոմա դիտարկենք: Բայց այս քայլը նշանակում է, որ մենք վճարել ենք բավականաչափ երկար ժամանակ մի բանի համար շատ ավելի շատ, դրա իրական արժեքն է»: