«Հայաստան» հիմնադրամի «Հեռախոսամարաթոն 2015»-ի արդյունքում՝ 1.3 մլն եվրո
«Հայաստան» համահայկական հիմնադրամի Ֆրանսիայի տեղական մարմնի գլխավորությամբ նոյեմբերի 18-22-ը անցկացված 16-րդ համաեվրոպական դրամահավաք-հեռախոսամարաթոնը, որին մասնակցել են Ֆրանսիայի (1.205.569 եվրո), Գերմանիայի (76.050 եվրո) և Շվեյցարիայի (24.554 եվրո) հայ համայնքները, արձանագրել է ավելի քան 1.3 միլիոն եվրո նվիրատվություն և նվիրատվության խոստում:
«Դրամահավաքի հասույթը կուղղվի Արցախում համայնքային կենտրոնների կառուցմանը, Տավուշի մարզում շարունակաբար իրականացվող գյուղատնտեսական ծրագրերի զարգացմանը, սիրիահայերի և իրաքահայերի օգնությանը», - ասված է «Հայաստան» հիմնադրամի հաղորդագրությունում:
Հիմնադրամի Հունաստանի տեղական մարմինն էլ նոյեմբերի 22-ին իր համայնքում անցկացրել է դրամահավաք հեռախոսամարաթոն, որի հանգանակությունները` շուրջ 29 հազար եվրո, կուղղվեն Լեռնային Ղարաբաղի Շուշիի շրջանի Քարին Տակ համայնքում մանկապարտեզի կառուցմանը:
Նվիրատվությունների ընդունումը շարունակվում է:
Հիշեցնենք՝ «Հայաստան» համահայկական հիմնադրամի հեռուստամարաթոնը այս տարի տեղի կունենա նոյեմբերի 26-ին և կկրի «Մեր տունը» խորագիրը։